Reportajen David da Costa
Ho sentimentu triste no respeitu boot, Prezidente Repúblika (PR) José Ramos-Horta, hato’o omenajen ba eis Prezidente Francisco Guterres Lú Olo, ho dehan katak Timor-Leste lakon erói ida, kombatente ida no lider nasionál ida ne’ebe durante ninia moris tomak dedika an ba luta libertasaun, dame no servisu ba povu no Estadu.
Prezidente Repúblika (PR), José Ramos-Horta, hatete Timor-Leste lakon lider nasionál ida ne’ebe iha kontribuisaun boot ba luta libertasaun no dezenvolvimentu Estadu, ho partida eis Prezidente Repúblika Francisco Guterres Lú Olo.
Lú Olo la’ós de’it veteranu ida ne’ebe luta durante tinan 24 iha rezisténsia, maibé mós kombatente, polítiku no erói nasionál ida ne’ebe servisu iha área luta armada no lidera Partidu Fretilin durante tempu naruk.
“Ita lakon, kombatente ida, veteranu tinan 24 luta, lakon polítiku ida, lakon erói ida ne’ebe okupa serbi iha estadu luta armada, polítika lideransa máximu Fretilin nian iha rai laran,” dehan Prezidente Repúblika, José Ramos-Horta, ba jornalsita sira iha rezidensia Saudozu Lú Olo nian, iha farol, Tersa 23/06.
Tuir Ramos-Horta, Lú Olo nia trajétoria polítika kompletu tebes tanba nia uluk sai membru Asembleia Konstituinte, depois Prezidente Parlamentu Nasionál no ikusmai sai Prezidente Repúblika. Nia konsidera katak partida lider ida-ne’e sai lakon boot ba Fretilin, ba lideransa nasionál no ba Estadu Timor-Leste tomak.
Nia mós subliña, Lú Olo nia legadu no eransa sei kontinua fó inspirasaun ba povu, liu-liu ba jerasaun foun no membru Fretilin sira, hodi kontinua kaer metin valór sira luta libertasaun, dame, liberdade no demokrásia ne’ebe lider rezisténsia sira hanesan Nicolau Lobato no Marí Alkatiri luta ba.
“Mais ne’e sei fó nia (Lú Olo) eransa, nia legadu sei fó inspirasaun ba povu tomak, ba joven sira, inspirasaun ba Fretilin, kontinua buat ne’ebe Nicolau Lobato sira iha hela rai laran. Ba li’ur doutor Marí Alkatiri, ba ita hotu-hotu nune’e hanoin buat ne’ebe nia kontribui atu kontinua kaer metin rai ida ne’e iha dame nia laran, liberdade, demokrásia nia laran,” nia afirma.
Iha parte seluk, Prezidente Repúblika hatete katak Estadu tenke tau matan ba família husik hela, liu-liu ba faluk no oan kiak sira, no haree mekanizmu legal sira ne’ebe bele garante apoiu ho dignidade ba família eis Prezidente Lú Olo nian.
“Ita sei haree, primeiru tuir lei ne’ebe ezisté, se laiha tenke kria, haree lejislasaun ne’ebe dignidade fó apoiu ba ema família hanesan Prezidente Lú Olo nian. Veteranu ida tinan 24 desde 1974,” nia dehan.
Maibé kona-ba relasaun pesoál ho Lú Olo, Ramos-Horta dehan katak sira sempre iha relasaun ida ne’ebe bazeia ba respeitu malu. Nia revela katak durante vizita privadu ida ba Malázia iha semana hirak liubá, nia tenta vizita Lú Olo iha ospitál, maibé iha momentu ne’ebá eis Prezidente ne’e tama ona iha Unidade Kuidadu Intensivu (ICU) tanba moras pneumonia.
Nia dehan katak durante ne’ebá nia la fó sai informasaun kona-ba estadu saúde Lú Olo nian tanba konsidera katak informasaun médika sira ne’e kompeténsia médiku sira nian.
Ikusmai, José Ramos-Horta reafirma katak partida Francisco Guterres “Lú Olo” reprezenta lakon boot ida ba nasaun Timor-Leste no ba povu tomak ne’ebe durante tempu naruk hetan benefísiu husi nia servisu no dedikasaun ba rai no povu.
“Purtantu sempre ho respeitu boot ba ema ne’ebe luta iha rai laran, ema ne’ebe serve estadu no povu. Prezidente Lú Olo ita lakon boot ida ba nasaun,” nia hateten.
Tuir objeravsaun jornalista Neon Metin iha rezidensia Saudozu Francisco Guterres Lú Olo, Xefe Estadu José Ramos-Horta ho staff Palasiu Prezidensial to’o iha rezidensia saudozu iha tuku 18:23 otl.
Bainhira to’o iha ne’ebá, prezidente kontinua ba rejistu naran iha resepsonista. Depois kontinua la’o ba iha saudozu Lú Olo nia fatin hodi fó omenajen ba saudozu. Bainhira remata omenajen, nia sai mai hakbesik ba saudozu nia feen ho oan hodi kaer liman no fó koranjen ba sira.
Nune’e mos nia hakbesik ba Sekretariu Jerál Partidu Fretilin, Marí Alkatiri, kaer lian, hakuak Marí Alkatiri no kaer iha nia kabas rua hodi fó korajen ba Sekretariu Partidu Fretilin.
Enkunatu eis Prezidente Repúblika, Francisco Guterres Lú Olo, hakotu nia jornada moris iha ospital Prince Court Medical Centre, iha Kuala Lumpur, Malázia. Nia mate iha loron 21 Juñu 2026, bainhira ba halo hela tratamentu intensivu iha ospital refere.