Reportajen Estajiariu Isac Sarmento
Oxfam iha Timor Leste liuhusi Programa Adaptasaun Mudansa Klímatika realiza feira iha jardim Bebora Dili hodi promove produtu órtikultura husi feto to’os na’in sira, nune’e eventu ida ne’e partisipa husi grupu to’os na’in ne’ebé mak lokaliza iha munisipiu Ermera, Suku Fatukeru, Suku Iriheu no mós Lauala, no feira refere sei hala’o durante loron rua nia laran hodi promove produtu orgániku sira.
Koordenadór bá Adaptasaun Mudansa Klímatika Januario da Conceição Soares dehan, feira refere organiza husi Oxfam iha Timor Leste, nune’e programa refere foka liu bá atividade mudansa klímatika maibé partikularmente haree liu bá atividade agrikultura bolu dehan Agrikultura Matenek bá iha Klima, programa refere realiza tanba iha intervensaun husi Oxfam liuhusi programa adaptasaun mudansa klimátika durante ne’e servisu hamutuk ho parseiru Permakultura Timor Leste (PERMATIL), husi feira refere hatudu kapasidade agrikultura nian ne’ebé antes nee hetan formasaun husi programa ne’e rasik.
“Ita fó ona kapasitasaun liga liu bá iha asuntu agrikultura matenek bá iha klima em termos de teoria no prátika sira ne’ebé mak ita hala’o ona bá iha ita-nia grupu 20 iha Ermera, iha Suku Fatukeru no mós Suku Iriheu no mós Lauala, entaun husi formasaun ne’ebé mak ita foó ona bá ne’e ho intensaun ida katak oinsá mak ho kapasitasaun sira ne’e bele tulun sira hasa’e sira-nia produsaun Hortikultura ne’e rasik” Dehan Koordenadór bá Adaptasaun Mudansa Klímatika Januario da Conceição Soares iha jardim Bebora Dili, (22/06).
Nia haktuir, wainhira to’os na’in sira hasa’e ona sira-nia produsaun sira tenke promove sira-nia produtu orgániku refere bá mós iha merkadu, tanba programa bá to’os na’in sira iha Ermera durante ne’e wainhira produz ona produsaun modo maioria to’os nain feto sira asesu de’it bá merkadu lokál entaun husi Oxfam liuhusi programa adaptasaun mudansa klímatika hakarak promove to’os na’in nia produtu sira liuhusi lori produtu sira mai nasionál hodi organiza feira refere hodi promove sira-nia produtu orgániku ne’ebé mak durante ne’e to’os na’in sira produz ona.
“Iha ne’e produtu oin hira kedas, lettuce iha ne’e, Tatsoi green, tatsoi white, iha mós longbing iha ne’e, fore sikoti depois kevits ho produtu hanesan aifuan sira hansan tomate depois iha mós pipinu iha mós aidila iha ne’e kuaze produtu hortikultua ne’e tantu produtu hortikultura ne’ebé mak produz husi tahan hanesan modo tahan sira no mós ida ne’ebé produz husi fuan hirak ne’e mak agora to’os na’in sira lori hela mai para oinsá atu bele fa’an liuhusi eventu feira ida ne’e” dehan koordenador programa.
Nia esplika, feira ne’e rasik organiza bá dalarua ona, iha fulan Abril hala’o ona iha Kios Matenek no nafatin involve grupu sira liu-liu feto sira ne’ebé mak durante ne’e involve aan iha vida agrikultura nian, feira ne’e nia prosesu kontinuasaun mak husi dia 22-23 junho hodi hala’o feira refere nune’e bele promove grupu to’os na’in sira-nia produtu ne’ebé mak iha.
Entertantu membru grupu Horti Wekinor Mediana Alves Martins sente apresia tebes bá geira refere tanba bele hetan kontaktu husi koordenadór bá feira refere hodi hola parte iha feira ne’e, nune’e nia sente orgullu tanba bele involve ona feto sira iha fatin refere hodi fa’an sira-nia produtu.