Reportajen David da Costa
Família Saudozu Francisco Guterres Lú Olo hato’o agradesimentu ba povu Timor-Leste, entidade Estadu, partidu polítiku, veteranu no komunidade sira ne’ebe fó solidariedade no partisipa iha serimónia despedida ikus ba saudozu Lú Olo nian iha Jardim Heróis Pátria Metinaro.
Domingos Guterres nu’udar alin ida husi Saudozu Lú Olo, agradese ba ema hotu-hotu ne’ebe partesipa iha haloot ikus saudozu Lú Olo nian. Saudozu Francisco Guterres Lú Olo ema ida ne’ebe simples no pasiénsia iha nia polítika no nia mos sai ezemplar ba ema hotu-hotu iha Timor-Leste.
“Ami orgullu tanba ami nia maun Lú Olo nia mate ema hotu, partidu polítiku hotu-hotu partisipa, ida ne’e maka Lú Olo duni. Lú Olo ema ida pasensia, ema ida simples ne’ebe sai ezemplu ba ema hotu. Ha’u orgullu ba ha’u nia maun, tanba ezemplu di’ak ba ha’u, nune’e mos ha’u husu ba hotu-hotu, iha membru sira hotu-hotu ne’ebe maka iha partidu FRETILIN modelu ida ne’e labele mate. Francisco Lú Olo maka mate, espiritu Lú Olo tenke moris iha FRETILIN nia laran, tenke moris,” dehan Domingos Guterres bainhira hato’o liafuan agradesimentu hafóin haloot Saudozu Lú Olo iha Jardim dos Heróis da Pátria, Metinaro, sexta 26/06.
Reprezentante família husu deskulpa ba sala ka buat ne’ebe saudozu Lú Olo halo durante nia moris. Família hakruk husu deskulpa ba polítiku, governante, no povu tomak, se karik iha desizaun, liafuan, ka asaun ruma ne’ebe la loos durante nia vida polítika, vida sivil no luta resisténsia, tantu direta ka indiretamente, ne’ebe fó kanek ba ema seluk karik enome familia hakruk no husu deskulpa.
Reprezentante família ne’e mos rekomenda ba Estadu no Governu hamutuk ho polítiku sira, veteranu sira atu fó liman ba malu hadi’a saida mak ladi’ak no lori buat di’ak sira lao ba oin hanesan ezemplu murak saudozu Francisco Guterres Lú Olo husik hela.
“Ba ha’u nia maluk sira hotu-hotu, povu doben Timor-Leste ne’ebe maka ohin prejensa iha serimonia Maktoban nian fatin ikus ida ne’e, ha’u hanoin povu triste, la’os familia de’it maka triste, Timor-Leste triste, tanba Lú Olo ema simples maibé hakarak duni hakoak ema hotu. Nia la haree ba koor, la haree ba rasa, la haree ba metan ka mutin, maibé nia haree hanesan ema Timor oan,” Nia hateten.
Saudozu nia alin, Domingos Guterres hato’o mensajen adeus ikus ba saudozu Lú Olo ho sentimentu kle’an no husu nia atu kontinua tau matan ba família, kamarada luta sira no povu Timor-Leste tomak. Lú Olo nu’udar maun ida ne’ebe di’ak, ne’ebe lori dame no unidade iha ema hotu nia laran.
“Adeus Maun Lú-Olo, tau matan hela mai ami, tau matan mos ba oan kiak nain-haat, ba ha’u nia bin Cidalia no familia hotu-hotu, tulun mos ba kamarada sira hotu iha ne’e no mos ba maun sira ne’ebe uluk hamutuk iha ne’e liu-liu maun Taur, maun Lere, maun-boot Xanana, nu’udar mos maun ida ne’ebe diak, maun Falur, maun sira seluk ne’ebe ha’u la temi ida por ida. Maun nu’udar maun di’ak Ida, tama sira nia laran ba, hamamar sira nia laran, fó liman ba malu ba Timor-Leste ida de’it. Obrigadu maun Lú-Olo,” nia konklui.
Iha fatin hanesan Sekretáriu Jerál Partidu FRETILIN, Marí Alkatiri, hateten, ohin hamutuk ho mana Cidalia ho subriña no sobriñu sira hotu mai haloot kamarada Saudozu Lú-Olo. Tanba ne’e, agradese ba entidade tomak, apoiu tomak husi governu no estrutura, instituisaun estadu nia hanesan Polísia, Fórsa Armada ne’ebe durante ne’e apoiu másimu ba iha Saudozu nia falesimentu to’o haloot iha fatin deskansa ikus nian.
Iha serimónia funebre Saudozu Francisco Guterres Lú Olo ne’e, entrega mos arma saudozu Lú Olo nian ne’ebe maka uluk uza iha ai-laran ba Tenente Jenerál Domingos Raúl Falur Rate Laek.
Nune’e entrega mos medalla ba saudozu nia oan mane boot Francisco Cidalino “Ola Kay” no entrega mos Bandeira Nasionál husi Prezidente Repúblika José Ramos-Horta ba saudozu nia oan mane segundu Eldino Nobre.
Entrega mos Dekretu Prezidente Repúblika husi eis Primeiru-Ministru Taur Martan Ruak ba Saudozu nia oan feto mesak Dália Luliana Nobre. Nune’e, entrega mos Bandeira FALINTIL husi Jenerál Taur Matan Ruak ba Saudozu nia ona Mane da toluk Felizito Samora Guterres.
Tuir Objervasun Jornalista Neon Metin iha terenu katak, bainhira hahú deslokasaun saudu Lú Olo nia isin mate husi Dili mai Jardim Heróis da Pátria Metinaro, ema rihun ba rihun maka akompañia saudozu nia isin mate no balun hamrik iha dalan hodi simu saudozu ho mataanwen no karik aifunan to’o iha Jardim Heróis Pátria Metinaro.
Jardim Heróis Metinaro sai fatin ida ne’ebe nakonu ho laran triste bainhira Millares husi povu Timor-Leste mai fó despedida ikus ba Saudozu Francisco Guterres Lú Olo.
Prezidente Repúblika José Ramos-Horta, governu, Veteranu sira, autoridade, juventude no komunidade husi parte oioin hamutuk hodi fó onra ikus ba lider ida ne’ebe dedika ninia moris ba independénsia no dezenvolvimentu nasaun.
Iha atmosfera ne’ebe hakmatek no emosional, mataanwen monu husi ema barak bainhira urna Saudozu tama ba fatin hakmatek ikus.
Enteramentu ne’e la’os de’it serimónia ida, maibé mos momentu ida atu povu Timor-Leste hanoin no kontinua valor, sakrifísiu no legadu ne’ebe Saudozu Francisco Guterres Lú Olo husik ba jerasaun sira tuir mai.