Reportajen David da Costa
Servisu intelijénsia no seguransa marítima husi Forsa Defesa Timor-Leste (F-FDTL) no Polísia Nasionál Timor-Leste (PNTL), susesu apreende 2.583 karton sigaru kontrabandu iha operasaun seguransa marítima ida ne’ebé realiza iha tasi Baucau bainhira embarkasaun roo karga “Famar Jaya Utama” tula sigaru kontrabandu, no mos detein ona sidadun estranjeiru na’in 7 envolve.
Porta-Voz Polísia Nasionál Timor-Leste (PNTL), Superintendente Xefe Polísia João Belo dos Reis, hateten, durante semana balun nia laran, servisu intelijénsia no seguransa marítima husi Forsa Defesa Timor-Leste (F-FDTL) no PNTL monitoriza movimentu embarkasaun karga suspeitu ida ne’ebé navega iha tasi Timor.
Informasaun ne’ebé rekolla hatudu katak iha posibilidade embarkasaun roo karga “Famar Jaya Utama” ne’e transporta merkadoria ilísita, liuliu sigaru kontrabandu, ne’ebé mai husi rede komérsiu ilegal estranjeiru atu infiltra ba merkadu Timor-Leste.
“Iha opersaun balun kona-ba karega ilegal iha tasi parte Baucau nian. Ita nia servisu intelijénsia no seguransa maritima husi Forsa Defesa Timor-Leste tantu PNTL, monitoriza hela movimentu roo ida ne’ebé halo sirkulasaun iha tasi Timor nian, roo ne’e ita suspeta tula sasan ilegal sira ne’ebé durante ne’e sirkula iha ita nia Nasaun,” Porta-Voz PNTL, Superintendente Xefe Polísia João B. dos Reis, liu husi Konferensia Imprensa iha Kuartel Jerál PNTL Kaikoli, Tersa 28/07.
Nune’e Autoridade Sguransa Maritima hamutuk ho PNTL halo intervensaun hodi hapara embarkasaun refere, ne’ebé iha tempu ne’ebá hatún ona ankora iha tasi parte Baucau. Embarkasaun ne’e depois lori ba Dili atu halo apreensaun ofisial ba hamutuk 2.583 karton sigaru.
Sigaru sira ne’ebé apreende kompostu husi marka oioin, hanesan Manchester, Marlboro Timor-Leste, Marlboro Mutin Indonesia, Dunhill, 555 Gold Virginia Tobacco, Manchester Sapphire Blue no Double Happiness. Marka sigaru sira ne’e mak durante ne’e hetan sirkulasaun iha merkadu Dili no mós iha munisípiu sira seluk, ne’ebé autoridade suspeita tama liuhusi transporte ilegal iha tasi.
“Sigaru sira ne’e maka bai-bain sirkula iha ita nia merkadoria iha Dili laran no mos iha Munisipiu sira, tanba transportasaun ilegal ne’ebé mai husi Tasi,” nia dehan.
Agora daudaun, PNTL kontinua halo prosesu investigasaun ba ema estranjeiru hamutuk nain hitu ne’ebé iha embarkasaun laran. Husi total ne’e, ema na’in-5 husi Myanmar no na’in-2 husi Xina, inklui sidadaun Xina balun ne’ebé hela kleur ona iha Timor-Leste.
Superintendente Xefe Polísia João Belo dos Reis, dehan tan, operasaun ida ne’e hatudu kapasidade no prontidaun husi forsa seguransa no defesa Timor-Leste atu servisu ho koordenasaun di’ak hodi interseta rede kontrabandu transnasional ne’ebé tenta uza tasi no territóriu Timor-Leste ba atividade ilegal.
Nia haktuir, apreensaun liu husi 2.583 karton sigaru ilegal representa golpe boot ida ba komérsiu ilísitu ne’ebé prejudika saúde públika, ekonomia nasionál no seguransa fronteira. PNTL reafirma nia kompromisu atu la tolera utilizasaun tasi teritoriál no territóriu Timor-Leste ba atividade kontrabandu no kriminalidade transnasional.