Reportajen David da Costa
Autoridade Timor-Leste liuhosi operasaun konjunta entre Polísia Nasionál Timor-Leste (PNTL), Diresaun Servisu Investigasaun Kriminal (DSIK) no Servisu Migrasaun Timor-Leste konsege detein sidadaun Xineza na’in-tolu ne’ebé suspeitu liga ho atividade ilegal Scam Call Centre iha área Kolmera, Munisípiu Dili.
Iha komunikadu ne’ebé Neon Metin sita, katak Autoridade Konjunta liuhosi Polísia Nasionál Timor-Leste (PNTL), husi Diresaun Servisu Investigasaun Kriminal (DSIK), hamutuk ho Servisu Migrasaun Timor-Leste, detein sidadaun Xineza na’in-tolu ne’ebé suspeitu envolve iha atividade ilegal Scam Call Centre iha área Kolmera, Munisípiu Dili.
Operasaun ne’e realiza nu’udar kontinuidade husi investigasaun no rezultadu husi kooperasaun entre autoridade kompetente sira atu kombate krime organizadu transnasionál, liuliu fraude online, ne’ebé bele ameasa seguransa, estabilidade no sistema finanseiru iha Timor-Leste.
“Iha operasaun refere, ekipa konjunta detein sidadaun Xineza na’in-tolu iha momentu ne’ebé sira hala’o hela atividade online suspeita liga ho Scam Call Centre, Nune’e iha detensaun ne’e, autoridade sira halo mós apreensaun ba evidénsia barak, inklui komputadór, laptop, telemóvel sira no aparellu rede internet Starlink ida, ne’ebé agora dadauk tama ona iha prosesu investigasaun,” hateten iha komunikadu ne’ebe Neon Metin asesu ohin iha Pagina Ofisial Facebook PNTL, Sexta 31/07.
Autoridade Konjunta hateten katak investigasaun sei kontinua atu identifika individu ka grupu seluk ne’ebé bele iha ligasaun ho rede Scam Call Centre ne’e. tanba ne’e, PNTL no Servisu Migrasaun reafirma sira-nia kompromisu atu kontinua haforsa kooperasaun interinstitusionál.
Atu nune’e bele kombate krime organizadu transnasionál no asegura katak ema hotu ne’ebé involve iha atividade ilegal sei responsabiliza tuir lei ne’ebé vigora iha Repúblika Demokrátika Timor-Leste.
Iha parte seluk, Komandu PNTL apela ba komunidade atu kontinua fó informasaun ba autoridade sira bainhira hetan indikasaun kona-ba atividade suspeita, tanba kooperasaun husi públiku konsidera importante atu prevene no kombate krime iha rai-laran.