Reportajen David da Costa Gusmao
Kandidatu eleitu Prezidente da Republika (RP), Dr. José Manuel Ramos Horta, sei halo diálogu iha parlamentu laran ho partidu sira ne’ebe maka reprezentante sira nia partidu iha parlamentu, atu nune’e bele restaura fali uma sagrada ka uma lulik Timor ne’e.
Ramos Horta dehan laiha inimigu iha rai ida ne’e, maibe iha adversáriu politiku ne’e iha, adversáriu polítiku ne’e kuaze permanente tanba demokrasia maka nune duni.
“Demokrasia laos hateten loron-loron hakuak malu, loron-loron halo diálogu, loron-loron halo konfrontasaun ideias,” dehan Horta liuhosi komferensia imprensa iha sede kandidatu nian Hudi Laran, Kinta 21/04.
Tanba ne’e maka sosiedade bele dezenvolve komfrontasaun ideias, komfrontasaun programa, debate klean, ida nee maka demokrasia dehan
“Agora hau hahú dialogu iha Parlamentu laran, ho reprezentante partidu politiku sira iha parlamentu ne’e, para ita restaura ita nia uma sagrada, ita nia uma lulik ida ne’e,” dehan nia.
Tanba regra sira ne’e Iha parlamentu rasik maka adopta, husi lei inan no Konstituisaun no rejimentu hateten katak liuhosi diálogu para oinsa bele hadi’a buat sira ne’e.
