Reportajen Umbelina dos Reis
Prezidente Confederação Desporto Timor-Leste (CDTL), Macario Floriano Sanches hatete, tinan 2023 CDTL halo planu naran Des-CDTL, reprezenta planu ne’ebé mak governu investe ba CDTL hodi prodúz sai programa prinsipál ba tinan 2023, ne’ebé prodúz bazeia ba tinan 2022 nian.
Hafoin CDTL deteta katak CDTL mós mai ho nia problema, federasaun mós mai ho nia problema, ho nune’e ami produz programa ne’e atu responde ezijénsia governu nian liu husi SEJD no Federasaun, tanba ne’e mak tinan ne’e ami foka liu ba Des-CDTL. Nia dehan, Des-CDTL hanesan programa ida ne’ebé hakarak mellora funsionamentu, fortalese Konfederasaun Desportu Timor-Leste, ne’ebé mak afiliadu ka asosiada mai iha CDTL.
Nia dehan, tinan ne’e Konfederasaun Desportu Timor-Leste tenke halo preparasaun ba Atleta Nasional ba SEA GAME Cambodia tinan 2023 nian, ida ne’e prioridade primeiru tanba CDTL mak mahon ba federasaun hotu-hotu, komunikasaun hahú husi federasaun olímpiku, komunikasaun entre governu no SEJD no kompeténsia atu kompete SEA GAME Cambodia. Segundu mak fortalesimentu instituisional, dezemvolvimentu rekursu umanu hodi hadi’a federasaun hodi halo funsionamentu di’ak ba estrutura tomak.
Programa seluk mak bolu dehan promove modalidade desportivu sira, tanba sá mak ida ne’e importante? Kompete iha SEA GAME lori sira organiza sira nia kampionatu nível nasional no munisipal, nune’e sira bele aprezenta sira nia programa ka talentu iha eventu refere, dehan nia.
“CDTL ne’e uma mahon ba federasaun hotu-hotu iha Timor-leste, nune’e Des ida da-8 ne’e, CDTL hakarak promove desportu Timor-Leste iha tinan ne’e, ba oin tenki iha kapasidade atu sai uma na’in ba kampionatu iha nível internasionál, ida ne’e sei diskute ho nível internasional tanba desportu ne’e mós faz parte ho turizmu nune’e ita halo ligasaun entre desportu ho turismu hodi bele atrai estrajeiru oan sira bele mai vizita nasaun Timor-Leste,”
Aleinde ne’e mós, CDTL planu hodi promove moris saudável iha vida desportiva nian no promove Timor-leste sai prestasaun kampionatu sira ne’ebé federasaun halo iha komunidade nia leet, CDTL tenki proteje hodi lori ba aprezenta iha governu ou SEJD.
Nia Konklui katak, desportu iha Timor-Leste la’os CDTL nian maibé desportu iha Timor-Leste ema hotu-hotu nian, nune’e ita hamutuk promove desportu Timor nian ba Mundu Internasional.
Confederação Desporto Timor-Leste (CDTL) hanesan organizasaun desportu ida ne’ebé hamriik independentemente hodi hamahon federasaun desportiva sira ne’ebé eziste iha Timor-Leste no halo parseria ho governo liu husi Sekretáriu Estadu Juventude no Desportu (SEJD)
