Reportajen Silvino Freitas
Aniversáriu Partidu Demokratiku ba dala 22, Prezidente PD, Mariano Assanami Sabino deklara katak, kontinua foku ba dezenvolvimentu tuir Planu Estratéjiku Dezenvolvimentu Nasionál (PEDN), hodi hadi’a povu nia moris, no fó kontinuidade ba mehi saudozu sira moris di’ak povu nian inklui dezempregu iha Timor Leste.
Assanami hateten iha IX governasaun PD sei la’o ho CNRT, nune’e durante defende no hakerek planu estratéjiku dezenvolvimentu nasionál ho kompromisu ne’ebé derivadu, tanba ne’e hanoin katak hakarak no planu sira ne’e sei realiza, hanoin mós katak pipeline tenke mai Timor Leste tanba ho hanoin ba indústria petrokímika iha kosta sul nian, ne’ebé importante tebes ba nasaun.
“Ita nia mehi nafatin abitasaun ba povu ne’e importante tebes, ita nia mehi kontinua nafatin oinsá kampu servisu ba joven sira, bele iha setór hotu maibé nia alvu prinsipál maka kampu traballu ne’e ita kria hodi bele halakon dezempregu ka hamiis dezempregu ne’ebé boot tebes iha Timor Leste” dehan Asanami iha intervensaun ba aniversáriu dala ruanulu resin rua PD nian, iha sede Kolmera, (10/06).
Nia dehan tan, PD nafatin louva ba eroi foun sira ne’ebé iha Inglatera, Irlandia, Korea no Australia sira maka heroi foun ne’ebé fó apoiu ba sira nia inan-aman no alin sira ne’ebé hela Timor Leste, tanba ne’e PD nafatin hamri’ik hodi fó, tanba ne’e PD apresia nafatin ba sira nune’e PD hamutuk ho estrutura tomak nafatin hatutan mehi ne’ebé Lasama no sira seluk husik hela sei kontinua nafatin, PD nia emar sira nu’udar mate restu ne’ebé firmi nafatin atu lori kontinuidade ba moris di’ak povu nian.
“Ho vinte dois anos hamri’ik iha ne’e husu deskulpa ba inan-aman sira hotu ba povu tomak no joven sira hotu, katak partidu ida ne’e seida’uk halo bu’at barak halo ona buat ki’ik balun maibé kontinua mehi no sei esforsu atu realiza mehi lutadór sira nian, nune’e ohin hamri’ik no apoiu ba maun boot Xanana nu’udar primeiru ministru atu liberta povu ida ne’e” dehan Assanami.
Iha fatin hanesan Prezidente Republika, Dr. Jose Ramos Horta hateten,tinan 22 PD partidu ida ne’ebé tanke prepara an nafatin, tanba to’o iha 2028 sei tau ba jerasaun foun nia kaba’as, maibé dadaun PD ho CNRT tenke ukun halo didi’ak ho estruturasaun estadu nian, iha seitor hotu-hotu ekonomia tenke sai forte nune’e iha 2027 entrega nasaun ne’ebé ho demokrasia.
“PD hanesan partidu prezente no futuru ha’u ho maun Xanana dezde partidu ne’e hahú ami apoia, to’o ohin loron PD konsege moris nafatin aumenta rekoopera monu hamriik manan tinan 20 esperensia la’ós partidu foun ida lideránsa PD la’ós lider foun neebe laiha esperénsia, iha esperénsia parlamentar, governasaun, akadémika, emprezariál internasionál ne’e duni prepara an didiak tinan 5 mai ne’e prepara an liu tan” dehan Horta iha aniversáriu PD nian.
