Reportazen Santina Lucia da Costa
Partisipasaun feto iha vida politika, sai asumtu importante relasiona ho Resolusaun Konselho Segurasan Nasoens Unidas 1325 Feto, Paz no Seguransa, iha pilar importante konaba Partisipasaun.
Ho asumtu ida ne’e Neon Metin dad alia ho Prezidente partidu Kmanek Haburas Unidade Nasional Timor Oan [KHUNTO], Armanda Berta konaba importansia partispasaun feto iha politika.
Ba Neon Metin, Prezidente Partidu KHUNTO hateten nudar Prezidente partidu KHUNTO kontinua suporta nafatin feto maluk sira, hodi partisipa iha vida politika no mos iha seitor sira seluk, no bele foti desizaun ruma. Suporta nafatin feto sira, keta lakon konfiansa, keta lakon fiar serbisu nafatin ho responsabilidade.
“Feto maluk sira bele partisipa vida politika, ekonomia, kultura, iha mós familia atu nune’e foti desizaun. Labele dehan katak feto iha dapur de’it, no haree labarik de’it, maibé direitu hanesan entre mane ho feto. Konstituisaun mós koalia iha ne’eba katak feto no mane, feto mesak mós labele halo buat ida, no mane mesak mós labele halo buat ida. Feto ho mane bele kompleta malu atu nune’e iha problem ruma no iha situasaun difisil ruma, bele resolve hamutuk, tanba ne’e presija duni feto nia prezensa”, hateten Armanda Berta ba Neon Metin iha CCD, 06/03.
Karik hanesan Prezidente KHUNTO sei hasoru obstaklu, tanba dalaruma sei kait ba kultura patrilineal ne’ebe metin hela? atual Ministra Solidariedade Sosial no Inkluzaun [MSSI] ne’e hateten sempre iha maibe liu hosi obstaklu ne’e hotu, presiza hetan suporta hosi feto maluk sira no mane maluk sira nia suporta makaas iha partidu nia laran.
“Nudar feto labele lakon fiar, tenke esforsu-an atu bele dezenvolve nasaun ida ne’e, ita haree katak durante luta ne’ebé naruk tebes, feto barak mak sai vitima, partisipasaun feto ne’e importante”, hateten Berta
