Reportazen Adroaldo ‘Saretukau’
Estudante Universidade Nasional Timor Lorosa’e (UNTL) fakuldade Agrikultura, departamentu Agro Sosia-Ekonomia hala’o konferénsia imprensa imprensa, hodi hatoo preokupasaun konaba komunidade area Raumoko, Suku Daudere, Posto Administrativu Lautem, Municipiu Lautem ne’ebe la asesu bee moos.
Porta-voz Daniel da Cruz liu hosi konferensia imprensa informa katak komunidade sira iha preokupasaun hodi hatutan ba governu, katak komunidade sira iha Suku Daudere, liliu área Raumoko kuaze tinan ida ona, makina kanalizasaun bee moos ladi’ak ona, ho nune’e komunidade sira labele asesu ba bee moos.
“Ami estudante hosi Departamentu Agro Sosio-Ekonomia, Fakuldade Agrikultura, UNTL hakarak hato’o kestaun nesesidade komimudade Suku Daudere nian, ba iha nivel kompetente ne’ebe responsabiliza, li-liu Diresaun Água no Saneamentu, atu tau matan ba komunidade sira iha área Raumoko, hodi halo rehabilitasaun makina kanalizasaun bee moos, atu nune’e komunidade sira asesu bee mos hodi sustenta ba sira nia moris Ior-Ioron”, hateten Daniel iha kampus UNTL, 12/08.
Iha fatin hanesan Koordenador Prátika Kampu, Alejandro D. S.G de Fátima hateten komunidade Raumoko tenki la’o kilómetru 5 ba kuru bee moos hodi konsumu no populasaun balu kuru bee dook liutan, liu-liu sira ne’ebé hela iha fronteira entre Laivai, sira ba kuru bee iha mota ne’ebe dook, nune’e susar ba sira atu asesu ba bee moos. Wainhira sira haris uza tasi been ne’ebé sira fura besik tasi, ba te’in no hemu sira tenki ba kuru iha mota ne’ebé dook hosi sira.
Suku Daudere iha aldeia hamutuk walu haenesan Aelafa, Anarua, Macalodo, Nassuloi, Sagueli, Samaira, Uanambere no Vassatoi ho total populasaun mak 2561 ho nia Xefe família total 578.
