Home Notisia CNC no FM Asina Nota Entendimentu Ba Monitorizasaun Tuir Rekomendasaun CHEGA!

CNC no FM Asina Nota Entendimentu Ba Monitorizasaun Tuir Rekomendasaun CHEGA!

354
0
CNC ho FM asina nota entindimentu. [Foto: Santina Lucia da Costa | 13.08.2020]

Reportazen Santina Lucia da Costa

Centro Nasional Chega! (CNC) ho Fundasaun Mahein (FM) asina Nota Entendimentu ho objetivu atu tulun malu halo monitorizasaun ba instituisaun sira iha setor defeza no seguransa nian.

Iha seremonia asina Nota Entendimentu iha CNC,  Diretor Ezekutivu CNC, Hugo Fernandes hateten ita hotu hatene media publika beibeik relatoriu ofisial husi PDHJ no Fundasaun Mahein hateten, maske iha ona politika, lei no regulamentu sira maibe dalabarak publiku kontinua rona no haree atuasaun husi membru forsa defeza no seguransa ne’ebe mak konsidera katak halo violasaun ba direitus humanus ba publiku, liuliu ba sidadaun sira.

Hugo Fernandes hateten Centro Nasional Chega! ho Fundasaun Mahein asina nota entendimentu, “se ita haree luan liu selebrasaun nota entendimentu ne’e, hodi tulun CNC tuir dekretu lei 48/2006 atu halo monitorizasaun ba implementasaun rekomendasaun sira ne’e.

“Iha rekomendasaun relatoriu Centro Chega balun koalia kona-ba oinsa maka halo reforma ba instituisaun governu estadu nian iha setor defeza no seguransa, pro-ezemplu haree ba ita nia istoria pasadu, ita nia tinan 24 laran, liuliu funu maun-alin ita haree katak, ita nia forsas armadas sira halo violasaun balun husi parte ne’ebe de’it. Depois wainhira iha okupasaun Indonezia ita hotu hatene militar, polisia no intelijensia Indonezia sira mos komete krime oioin, violasaun oioin ba ema Timor oan sira ne’ebe hakarak ukun-an”, afirma Diretor Ezekutivu CNC, ba jornalista sira iha salaun CNC, Balide loron Kinta-feira, 13/08.

Hugo Fernandes dehan iha periodu ida ita ukun-an ida ne’e, ita hakarak polisia Timor, forsa defeza, intelejensia sira, labele halo nafatin buat ne’ebe mak uluk militar ho polisia Indonezia halo, sira tenki respeita ema nia direitus humanus, sira tenki halo atuasaun tuir politika, lei ho regulamentu ne’ebe mak iha.

Hugo Fernandes esplika iha nota entendimentu ne’e durasaun to’o tinan tolu nian, iha nia implementasaun ne’e mak dalaruma iha atividades sira atu halo monitorizasaun lor-loron nian, iha mos konferensia, seminar no mos halo formasaun, liuliu fo formasaun ba forsa defeza no seguransa sira kona-ba direitus humanus, kona-ba etika, halo atendimentu di’ak ba publiku, oinsa halo atuasaun polisia ho ita nia intelijensia sira, situasaun krize nia laran, oinsa halo atuasaun di’ak ba demonstrasaun.

Iha fatin hanesan Diretor Ezekutivu Fundasaun Mahein, Joao Almeida akresenta akordu nota entendimentu ida ne’e, Fundasaun Mahein sei halo monitorizasaun tuir rekomendasaun Centru Chega ninian, liuliu iha area defeza no seguransa, ne’ebe foka liu ba asuntu sira direitus humanus nian katak hahalok sira iha pasadu, husi okupasaun nian ita labele repete tan.

Joao Almeida informa katak Fundasaun Mahein nia monitorizasaun ba forsa dezefa no segurasa sira inklui PCIC halo violasaun direitus umanus ba sidadaun sira.

“Kazu ne’ebe Polisia Sentifiku Investigasaun Kriminal halo hasoru ita nia maluk ativista sira, estudante sira, wainhira ba konfirma kona-ba petisaun ne’ebe hato’o ba Ministeriu Justisa, liuliu la aseita ho esbosu lei kriminaliza difamasaun no kazu seluk ne’ebe viral los iha media sosial hanesan fulan ida ne’e no fulan kotuk, elementu balun husi PNTL halo agresaun fizika hasoru ita nia sidadaun, iha ne’ebe ita nia sidadaun iha ona edifisiu polisia nian, agora ema nia sala ka los, investigasaun mak bele determina no hatete katak ema nia sala ka los so tribunal de’it mak bele pronunsia kazu ida ne’e, no mos kazu F-FDTL ne’ebe akontese iha Manumeta Rai-hun”, hateten Joao Almeida.

LEAVE A REPLY

Please enter your comment!
Please enter your name here