Home Feature COVID-19: Istoria Feto Nain 2, Lorença ho Justina, Foti Kredit Ba Negosiu...

COVID-19: Istoria Feto Nain 2, Lorença ho Justina, Foti Kredit Ba Negosiu Maibe Agora Sasan La Folin

3337
0
Kios Dalan Ninin iha Laclubar (Foto: Adro Serutukau)

Reportajen Adro Serutukau & Ato Lekinawa Costa

Iha Kruzamentu Rulalan, Postu Laclubar hanesan kruzamentu ne’ebé liga ba Postu Administrativu Laclubar Vila, Diresaun ba Postu Administrativu Natarbora inklui liu ba Viqueque no Same. Iha kruzamentu ne’e mak aldeia rua hosi Suku Orlalan harii kios sira hodi fa’an sasan kiik sira nomos aifuan hodi hein transporte públiku hosi Laclubar Vila, Natarbora inklui Bis balun hosi Viqueque ne’ebé liu hodi sosa netik sira nia sasan. Maibe situasaun estadu emerjensia tanba COVID-19 halo sira ladun hetan rendementu.  

Lorença Soares ho Justina Soares faan sasan iha estrada ninin. Sira nain rua foti osan hosi ajensia mikrokreditu rua, Moris Rasik ho Tuba Rai Metin. Semana rua mai sira nain rua tenke selu osan funan ba kredit. Agora dadaun sira sente todan tanba sasan la folin. Sira mos hanoin kona ba sira nia oan no sira nia moris bainhira situasaun COVID-19 ne’e hotu, saida mak sira apoio oan sira tanba agora dadaun sira la iha rendementu  

“Agora ne’e ema la hola ami nia sasan tanba kareta ho motor la halai ne’ebé penumpang la iha atu sosa sasan sira ne’e. Agora ne’e da-dauk sorti di’ak kareta ruma ka motor ida ka rua liu hosi ne’e para hodi han netik Pop mie, sosa netik be akua, manu tolun da’an, se lae la iha liu, tanba agora estadu bandu ne’ebe ema la iha liu atu sosa, “ Lorença Soares negosiante kios hatete.

“Ai-fuan ne’ebé ami fa’an mos hanesan, motor ho kareta halai netik be hola ne’e di’ak, se lae ami husik to’o dodok de’it. Uluk ne’e se keos sira ne’e loke hotu, penumpang barak, to’o kalan ami sei hetan netik $5 to’o $10, ” Lorença hatutan.

Lorença Soares agora dadaun kredit hela osan hosi ONG moris rasik. Ida semana ida ka rua nia laran nia tenke hatama fali osan ba Moris Rasik. Lorença dehan se ema Moris Rasik nian mak nia tenke haraik an ba sira tanba agora nia osan la iha atu selu tanba sasan la folin, no nia sente susar atu hetan rendementu.

Hanesan mos ho Lorença, no mos ema seluk, sira hanoin kona ba moris depois de situasaun COVID-19 ne’e atu sai oinsa. Ba Justina Soares, nia preokupa hela bainhira nia oan sira tama fali eskola, nia hanoin kona ba saida nia bele fo ba nia oan sira.

“Tanba labarik sira eskola ne’e be ami naran tuur fa’an hela ne’e, ami atu la tuur hein keos mos ami atu han saída, situasaun di’ak ona labarik sira ba eskola ami atu fó saída. Ne’e be loron ida ami hetan $1.50 cent mos ami tenki tur hein,” Justisa Soares, nain ba kios kiik oan ida iha dalan Laclubar nian hatete.

“Uluk kareta sei halai ami fa’an sasan sei folin, agora ne’e kareta penumpang mos la iha. Ami hein, sorti di’ak motor sira liu mak sira sosa ne’e, se lae la iha. To’o kalan ami hetan $1, $2, to’o $10 ami la hetan. Uluk kareta sei halai ami hetan $15 to’o $20, agora la iha, ” Justina haktuir tan.

Justina mos expresa nia laran moras tanba rendementu la iha duni. Nia sente la justu tanba iha situasaun hanesan ne’e veteran sira, no funsionariu publik iha osan nafatin, maibe laos ba nia, no sira seluk mak buka moris hanesan ho nia.

“Estadu emerjensia ne’e kareta sira la halai hotu ne’e ami sente laran moras tanba ami han saída. Ba ema sira ne’ebé veretanus, simu osan terseira idade, funsionáriu sira ne’e di’ak, be ami sira vida swasta ne’e.”

Justina mos preokupa ho nia kreditu iha ONG Tubarai Metin. Nia dehan nia sei la iha kbiit atu selu kredit tanba sasan la folin.

“Ami fila liman la boot, ami ta’uk tanba kredit tan osan hosi ONG Tubarai Metin, se ami tur ema mai husu, ami atu selu saída, taka tan hanesan ne’e ami ta’uk los. Sira mos la taka, sira servisu nafatin, ne’ebé ami dehan tempu moras la’o ne’e taka karik be di’ak. Se sira mai karik ami lori saída hodi estor ba sira, “ ho lian todan Justina konta nia situasaun susar mak nia hasoru dadaun.

COVID-19 afeta ema hotu nia moris maibe la fo nivel impaktu mak hanesan ba klase sosial diferente. Membru governo, membru parlamentu, funsionariu publik, veteranu, empregadu ONG sira, no empregadu setor privadu balun iha nafatin rendementu fulan nian. Maibe ne’e la akontese ba negosiador ho kios kik sira. Kios iha Dili laran, liliu kios mak besik ba populasaun barak, no kios iha area rurais mos rendementu la hanesan.

Concelho Ministru aprova ona medida atu apoio ba nia sidadaun sira, inklui tetu hela atu fo $100 ba uma kain ida. Ba Lorença ho Justina, se karik la iha estadu emerjensia, sira bele hetan $10 too $20 loron ida. Signifika sira bele hetan liu $100 fulan ida. Bainhira halo deit kalkulasaun ho padraun Banku Mundial nian ba ema kiak, loron ida ema ida hetan $1.50 cent, se familia ida iha ema nain 5 (tuir taxa medida familia Timor-Leste nian), loloos ne’e governo presija fo $232.50 fulan ida, laos $100. Governo bele tetu fo valor bot liu $100 ba familia kiak sira, familia vulneravel sira, no sira ne’ebe mak kredit hela osan iha  ajensia kredit sira. 

Print Friendly, PDF & Email

LEAVE A REPLY

Please enter your comment!
Please enter your name here