Reportazen Zevonia Vieira
Parlamentu Nasional ohin loron 18 Maiu ho agenda halo destituisaun ba Prezidente Parlamentu Nasional (PNN), Arao Noe ne’ebe proposta mai hosi bankada FRETILIN, PLP no KHUNTO. Tuir rezimentu Parlamentu Nasional katak plenaria sira halao iha oras tuku 9:00 dader no fleksibilidade bele hahu iha oras tuku 10:00.
Membru parlamentu nasional sira maioria iha ona sala de plenaria, maibe iha oras tuku 10:00 plenaria la realiza no konsege akontese konfrotasaun entre membru parlamentu sira hosi bankada CNRT ho bankada FRETILIN no PLP.
Tuir obsersaun Neon Metin hatudu katak membru parlamentu sira hosi bankada CNRT hodi hakat ba meza Prezidente Parlamentu Nasional (PPN), hodi asegura kadera PPN nian.
Hosi bankada FRETILIN no PLP ezije para bele hahu ona plenaria no husu ba Prezidente Parlamentu Nasional atu bele tama iha fatin plenaria hodi dirize meja, maibe PPN rasik la tama iha sala de plenaria.
Hosi observasaun Neon Metin mos hatudu katak deputadu bankada CNRT, Jose Virgilio asegura hela kadera PPN iha oin, hodi nune Vice Prezidente Parlamentu Angelina Sarmento labele lidera plenaria.
Maske nune vice Prezidente Parlamentu Nasional Angelina Sarmento no Vice PPN Luis Roberto kontinua tur iha sira nia kadera iha meza PPN.
Iha situasaun refere microphone sira iha plenaria laran mos la fungsiona durante loron tomak nia laran. Wainhira Vice Prezidente Parlamentu Nasional (PPN), Angelina Sarmento hatan pergunta hosi Lusa konaba tanba microphone la funsiona?
Ba Lusa Vice PPN hatan katak gunsionariu parlamentu mak blokea hotu funsionamentu microphone tanba ne’e ma la funsiona. Kada deputadu no deputada sira iha direitu atu uza microphone ne’e hatoo sira nia deklarasaun no pontu de ordem maibe ida ne’e la akontese.