Reportazen Francisco JDA
Centru Integradu Jestaun Krize [CIJK] liu hosi sala de situasaun hodi relata fila informasa konaba moras pandemia Covid-19. Liu hosi konferensia imprensa, Porta-Voz CIJK, Dr. Rui Araujo informa katak Timor-Leste tama ona loron 52 laiha kazu detetadu foun.
Total kumulatiu exame laboratoriu hamutuk 1833, total kumulativu rezultadu negative hamutuk 1809. Total ema ha kuarentena obrigatoriu iha nain 49 iha Dili no iha municipiu hamtuk nain 24. Ba auto-kuarentena iha Dili total nain 27 no iha municipiu iha nain 21. Total ema ne’ebe liu ona period kuarentena obrigatoriu hamutuk 2457, iha municipiu hamutuk 522 no iha Dili hamutuk 1935.
Maske iha Timor-Leste sedauk ka laiha kazu foun no sedauk iha evidensia koanaba transmisaun iha komunidade, liu hosi konferensia imprensa iha CCD, loron 15/06, Dr. Rui apela ba populasaun tomak, liu-liu ba joven sira, atu kumpri nafatin ho disiplina, medidas distansiamentu sosial koletivu, no mos medidas protesaun 3 individual no ijiéne liman-nian.
Tur Dr. Rui katak medida hirak ne’e, tenki sai parte husi ida-idak ninia komportamentu loron-loron, nu’udar pratika ne’ebé matenek-nain sira hanaran nova normalidade/new normal/normalidade foun.
Normalidade foun signifika ita tenki hatoman-an moris ho toman-foun balun, ne’ebé moras Covid 19 husik hela mai ita hanesan, hamri’ik do’ok husi ema seluk, minimu metro ida ho balun, kumprimenta malu la presiza bensa-liman, la presiza kaer-liman, la presiza haku’ak-malu ka rei-malu, uza mascara, fase-liman bei-beik ho sabaun ka uza dezinfetante liman-nia no la presiza sai husi uma, wainhira la presiza tebes.
“Wainhira ita hotu hala’o ho disiplina normalidade foun, ita hotu sei kontribui atu ita nia a’an-rasik, ita nia familia no viziñu sira iha ita nia bairru ka ita nia servisu-fatin, no Timor-Leste tomak nafatin do’ok-husi moras Covid 19. Mai ita hotu hala’o normalidade foun, atu bele hado’ok-a’an husi moras Covid 19”, hateten Dr. Rui Araujo