Reportazen Santina Lucia da Costa
“Deklarasaun estadu emerjénsia sei parsialmente suspende no limite direitu ba sirkulasaun internasionál, liberdade sirkulasaun no fixasaun rezidénsia iha pontu hotu-hotu, iha territóriu nasionál no direitu ba rezisténsia”. Prezidente Republika
Prezidente Repúblika, Dr. Francisco Guterres Lú Olo dekreta ona Estadu Emerjensia da dala neen iha loron 3 Outubru 2020 durante loron 30.
Prezidente Repúblika dekreta estadu emerjénsia hafoin Parlamentu Nasionál, ohin, 3 outubru, fó autorizasaun ba renovasaun. Estadu Emerjensia ne’e hahú husi tuku 00.00 iha Loron Segunda 5 Outubru 2020 no sei remata iha loron 3 Novembru 2020, oras tuku 23:50. Deklarasaun estadu emerjénsia sei abranje territóriu nasionál tomak.
“Deklarasaun estadu emerjénsia sei parsialmente suspende no limite direitu ba sirkulasaun internasionál, liberdade sirkulasaun no fixasaun rezidénsia iha pontu hotu-hotu, iha territóriu nasionál no direitu ba rezisténsia”, hakuir komunikadu imprensa ne’ebe Neon Metin.info asesu iha Palaciu Prezidensial Nicolau Lobato, Aitarak-Laran, loron, 03/10.
Membru Konsellu Superior Defeza no Seguransa no Konsellu Estadu, iha loron 30 Setembru, rekomenda ba Prezidente Repúblika, atu hato’o mensajen ba Parlamentu Nasionál husu autorizasaun ba renovasaun estadu emerjénsia tuir pedidu husi Governu.
Iha loron ohin mos Parlamentu Nasonional aprova ona pedidu hosi Prezidente Republika hodi autoriza Prezidente Republika hodi dekreta Estadu Emerjensia, liu hosi eleisaun iha plenaria ho votus afavor 55, abstensaun 0 no kontra 0
Iha komunikadu ne’e afirma desde fulan Marsu, COVID-19 nu’udar moras importadu, Timor-Leste implementa kedas estadu emerjénsia bainhira rejista kazu pozitivu ida.
Liu hosi komunikadu imprensa ne’e mos informa katak implementasaun estadu emerjénsia nu’udar medidas preventiva no kontrolu COVID-19, atu hases sidadaun hotu-hotu husi kalamidade públika.
Husi kedas fulan Marsu 2020 to’o ohin loron Timor-Leste rejista kazu pozitivu na’in-ida no na’in-27 rekuperadu. Organizasaun Mundial Saude (OMS) nia dadus global hatudu katak kazu konfirmadu ba loron 03 Outubro nian hamutuk 34,863,871, ema ne’ebe mate hamutuk 1,033,780 no rekuperadu hamutuk 25,914,744