Home Feature Anoi, Idade 12, Moris Kiak no Hetan Violasaun Sexual iha Uma Laran

Anoi, Idade 12, Moris Kiak no Hetan Violasaun Sexual iha Uma Laran

5544
0
Ilustrasaun konaba kazu violasaun sexual (insestu) iha uma laran. [Foto: copyright trito.id | 04.10.2020]

Reportagen Frans, Adro, David, Adalgisa

Anoi (la’os naran loloos), tinan 12, loloos ne’e halimar ho ninia labarik maluk sira. Maibe tanba violasaun sexual mak halo hosi família rasik, Anoi tenke kous oan sedu, lakon nia eskola no possivelmente lakon nia esperança ba futuru. Kazu insestu ne’e akontese iha ba Anoi iha Suku Ponilala, Munisipiu Ermera.

Anoi moris iha Ermera. iha loron 15 fulan Abril 2007, nudar estudante pre-sekundaria klase 1 iha eskola Ponilala. Kazu insestu ne’e akontese bainhira Anoi nia inan-aman ba Dili, husik Anoi hela mesak ho nia tiu na’in rua ho nia primu ida, momento ne’eba Anoi foin klase 4. Hanesan família hotu iha Timor, Anoi nia inan-aman tau fiar ba Anoi nia Tiun hodi tau matan bainhira sira husik hela uma hodi ba lia ruma, ka ba buka moris. Anoi nia inan-aman família kiak, la iha toos kafe, moris ho atividade agrikultura seluk.

Loron ida, Anoi nia inan-aman husik hela sira, mai Dili, no husu ba Anoi nia Tiun atu tau matan hela. Anoi nia Tiun iha hanoin at ona, nia habosok Anoi ho nonton vídeo iha Telefone. Anoi la hatene buat ida, Anoi hanoin katak nia Tiun iha hanoin positivu ba Anoi. Tiu ne’e lohi nia subrina ho vídeo porno depois dehan ba Anoi liafuan, “se o hakarak hasala malu ho hau”?. Anoi husu ba nia Tiun, “saida mak hasala malu”? Anoi nia Tiun la responde. Derepenti hasai Anoi nia ropa no halo hahalok “at” ba Anoi. Maske nune’e Anoi hatan atu kesar nia Tiun hodi dehan fali, “Apa kiik halo hanesan ne’e mai hau sei keixa ba apa ho ama”. Anoi nia Tiun dehan, “o kesar, hau sei sona mate o!”. Liafuan ameasa ne’e halo tauk Anoi, no Anoi la konsege kesar ba nia inan-aman. Hahalok at ne’e akontese ba Anoi wainhira Anoi sei tur iha eskola Primaria Klasse 4.

Hahalok ne’e akontese laos para deit iha ne’e maibe kontinua akontese tan hosi Anoi nia primu. Bainhira Anoi haris hela iha hariis fatin, Anoi nia primu dudu odamatan derepente no perkosa Anoi ih haris fatin laran. Anoi hetan ameasa atu la konta hahalok sira ne’e, nia tauk maibe tahan deit. Anoi nia tauk sai opurtunidade ba nia violador sira. Bainhira akontese tan violasaun hosi Anoi nia Tiun seluk ida, Anoi tama ba ona iha idade feto ran nian. Anoi hetan isin rua maibe nia rasik la hatene no kontinua ba eskola.    

Ikus mai Anoi nia Ama hahu desconfia ho mudança iha Anoi nia isin, no husu Anoi, “Keta iha buat ruma iha ne’e dehan sai deit”? Anoi laran susar ho tanis no dehan sai ba nia ama saída mak akontese tiha ona. Anoi la hetan baku hosi nia inan. Maibe Anoi nia aman hahu hanoin at ona ba Anoi tanba halo sala. Hatene ida ne’e ikus mai Anoi nia Inan haruka Anoi halai ba  nia Avo sira.

Anoi nia inan-aman konsege halo keixa ba Polisia iha Ermera no kontinua lori ba Pradet  no ikus liu mai ha iha Fokupers. Suspeitu nain tolu ne’ebe mak halo violasaun sexual ba Anoi  dadaun ne’e iha hela Polisia Ermera. Prosesu ba kazu  ne’e lao hela maibe sira seidauk tama prizaun.

“Hau senti moe no triste, hau senti lakon futuru. Bebe ne’e moris pai ho mae mai hare. Hau hadomi los bebe ne’e, momentu hanesan ne’e hau la hatene no hau nonok deit”, Anoi haktuir istoria ne’e ho nia bebe toba iha nia sorin ho naran Joao Paulo.

“Bainhira hau isin rua hau senti tauk, tanba la hatene partus bele ka lae? Mana sira iha FOKUPERS sempre akompanha ami ba konsulta no sira kontinua akompnha”, Anoi hatutan.

Anoi ba uma mahon  iha  fulan April 2020, Anoi hanoin atu eskola fila fali. Nia hakarak halo inan-aman kontenti fali.

“Hau nia kolega sira iha Ponilala hatene ona, mas  la hatene sira koalia saída? Hau eskola fila fali karik hakarak sai Doutora”, Anoi hato’o nia esperança moris maibe hanoin mos kona ba moe ne’ebe nia sei hetan hosi nia kolega sira.

Ponilala laos Suku ida mak dook hosi Dili, sa tan hosi Munisipiu Ermera. Suku ida ne’e la iha asesu regular ba transporte publik no to’o agora seidauk iha eletrisidade. Maski nune’e rede telefone ho internet funsiona. Ema sira mak iha osan bele sosa telefone no bele asesu ba internet, inklui asesu ba sitiu pornografia sira. Istoria Anoi nian hahu ho maneira Anoi nia Tiun lohi Anoi ho nonton iha telefone.

ilustrasaun kazu vilasaun sexual (insestu) ne’ebe akontese iha uma laran. [Foto: copyright cnnbanten | 04.10.2020]

Saida mak akontese ba Anoi ne’e violasaun sexual no violasaun ba dereitu labarik nian no ida ne’e mak akontese iha uma laran no halo hosi membro família rasik no ida ne’e nudar krimi insestu. Krime ida ne’e ema hotu preokupa tanba hahalok hanesan ne’e fo presaun bo’ot ba vitima sexual, liu-liu ba  maluk feto sira ne’ebe ho idade minoridade, vitima nia inan-aman, no mos komunidade. Labarik sira mak hasoru kazu hanesan ne’e hetan presaun psikolojiku iha sira nia moris, no sira nia futuru ameasadu

Relasiona ho kazu insestu ne’e, tuir prespektiva sosiedade sivil, Diretora Ezekutiva FOKUPERS, Maria José Guterres ba neonmetin imforma,   violasaun seksuál akontese bebeik bá labarik ki’ik-oan sira iha Timor-Leste.

“Hahu husi fulan Janeru to’o fulan Jullu ne’e (2020) ami simu kazu violasaun seksuál hasoru labarik ne’e hamutuk 7, abuzu seksuál bá labarik iha 10, insestu ne’e iha 3. Dadaun ne’e ami lori sira bá hela iha uma mahon ne’ebe mak FOKUPERS prepara bá vitima sira”, Diretora Ezekutivu  informa.

Diretora Maria Jose mos esplika katak kazu insestu tolu ne’ebe akontese ne’e mai ho nia istoria ne’ebe la hanesan. Labarik balun bá toos mak foin akontese bá sira tanba toos distansia ne’ebe dook husi uma. Balun bá hili ai-sunu mak akontese. Balun akontese tanba hela mesak iha uma no balun akontese beibeik ona abuzu seksuál ne’e uluk sira sei ki’ik, hanesan saída mak akontese ba Anoi.

Organizasaun ne’ebe halo monitorizasaun ba sistema justiça nian, JSMP fo sai nia dadus katak, iha tinan 2020  rezista kazu insestu iha ema na’in 2 de’it, ida mak desizaun pena prizaun tinan 13 no ida seluk sei prosesa tuir lei. Maibe hahu husi 2012 to’o 2018 mak  hamutuk 49. Iha tinan 2019 kazu insestu na’in 6 mak rejistu. Iha 2019 ne’e ida mak  suspensaun ba pena, kazu ida desizaun prizaun tinan 18, kazu ida tinan 6, kazu ida tinan 13 kazu ida tinan 7 no kazu ida tinan 14 liu fulan ne’en.

Tuir JSMP violasaun sexual akontese ba labarik kiik liu mak idade 5 mai kraik, iha 2%, no pursentu ne’ebe boot liu mak idade 14-16, iha 29%. Seluk mak idade 5-9, iha 4%, idade10-11, iha 4%, idade 12-13, iha 25%, no tinan 17 ba leten iha 22%. Violasaun sexual ba menoridade barak liu halo hosi aman ba oan, 43%, no seluk halo hosi aman padrasto, primo ba prima, maun ba alin, Avo nane ba be-oan, no hosi Tiu ba subrina iha 20%.

Aktus hirak ne’e tuir lei ne’e krimi. Violasaun seksual ba menor ho penetrasaun ne’ebe kategoriza nu’udar violensia domestika ne’ebe hakerek iha artigu 177 (1) no 182 ho krime publiku no artigu 35 hosi lei krime violensia domestika.

Parte Governo kontinua luta makas atu bele kombate no minimiza kazu violasaun sexual. Diretur Jeral ba Juventude no Desportu, David Tomas de Deus, hatete katak violasaun sexual ne’e krimi. Sekretaria Estadu Juventude no desportu (SEJD ) halo tiha ona programa prevensaun balun, inklui kona ba abilidade moris nian, hatene kona ba internet saudável, no oinsa joven sira hadook an hosi risku. Importância ba jovens sira atu koinese sira nia an biolojikamente no fizikamente.  

“Joven barak seidauk iha koinesimentu ba sira nia isin lolon rasik. Exemplu konkretu mak balun la hatene ninia periudu de menstrusaun, ida mos kona ba funsionamentu orgaun. Sira presija hatene ida ne’e oinsa mak bele trata no konsidera mudansa sira ne’e. Iha momentu sira hanesan ne’e saida mak sira bele halo, no saida mak sira labele halo. Se lae bainhira sira monu iha risku nia laran sira nia esistensia sosiedade ne’e ladun hetan tratamentu ne’ebe mak diak hosi komunidade no familia rasik ne’e mak dalabarak akontese”, Diretur Jeral David esplika.

Anoi karik nunka atende programa sira kona ba abilidade moris nian mak fornese hosi SEJD. Karik mos tanba programa SEJD nian seidauk to’o iha Ponilala. Dala ruma mos Anoi nia eskola la hanorin matéria sira relasiona ho ema nia isin loloon no funsaun sira. Maibe realidade mak Anoi ho nia inan-aman nia moris kiak sai mos fator importante ida hodi tau Anoi iha situasaun risku nia laran. Inan-aman ba buka moris ba oan sira, husik hela oan sira iha uma mesak. Governo halo ona programa prevensaun ne’ebe haree hosi parte adolescente nia an, maibe seidauk iha programa sira mak haree hosi parte uma saudável no comunidade seguru ba adolescente sira.

LEAVE A REPLY

Please enter your comment!
Please enter your name here