Home Notisia Grupu Fo Liman ba Malu, LOCA, LOAD Distribui Sasan Emerjensia Iha Laclubar

Grupu Fo Liman ba Malu, LOCA, LOAD Distribui Sasan Emerjensia Iha Laclubar

275
0
Grupu Fo Liman ba Malu, LOCA, LOAD entrega sasan iha Laclubar. [Foto: Adroaldo | 28.04.2021]

Reportazen Adroaldo “Saretukau”

Grupu Movimentu Solidariedade fo Liman ba Malu, Lafaek of Road Challenge Adventure (LOCA) no Loriku Adventure (LOAD) fo ajudus umanitáriu nesesidade bázika ba komunidade afetadu dezastre naturais siklone ne’ebe akontese iha loron 4 Abril iha postu Laclubar

Iha serimódia entrega apoiu ajudu umanitáriu, Koordenador Jeral grupu tolu nian, Nelson Turquel hateten asaun ida ne’e espesial tebes, tanba hafoin loron rua akontesimentu, sira haree akontesimentu ne’ebé boot tebes hosi video no imajen iha média sosial, ne’ebé Laclubar oan rasik publika, hafanun sira hodi mobiliza malu to’o iha Laclubar, atu fo apoiu ruma ba komunidade afetadu sira.

“Ami hahú rekolla sasan, ne’ebe mai hosi doador, kolega sira ne’ebé la’os iha Díli de’it, balu hela iha Austrália Portugal. Kolega timoroan sira serbisu iha Inglatera. Ema kuaze hotu-hotu fo sira nia kontribuisaun, sasan sira ne’e la’os hosi ami, sasan sira ne’e hosi Timor oan sira hotu iha Dili, TImor laran tomak, iha rai li’ur hotu mak fo sira nia kontribuisaun haruka netik osan mai, atu hola sasan sira entrega ba ita boot sira. Inklui mos PARCIC ne’ebé haruka sira nia sasan tuir ami”, hateten Kornedador Nelson iha serimónia entrega sasan ba vítima sira iha Postu Laclubar Domingu 25/04.

Koordenador ne’e hatutan katak los duni haree situasaun Laclubar afetadu duni, wainhira haree pontu sira iha estrada ba Laclubar kotu hotu, uma estraga no rai halai.

“Sasan sira ne’ebé ami lori mai ne’e, la’os hodi mai ho kuantidade barak ka oi-tuan, imi lalika haree barak ka oi-tuan, ami mai ho laran, ami hodi sasan sira ne’e ho laran”, tenik Nelson

Iha parte sorin ba asaun solidáriu ne’e, Administrador Postu Laclubar, Natalino Martins de Carvalho fo obrigadu no agradese wa’in ba grupu ne’e, tanba bele ho laran lolo netik liman ba populasaun sira iha Postu Laclubar.

“Ho situasaun ida ne’e, ita bele fanun fali ami Postu Laclubar, tanba dia 4 Abril liu ami hasoru problema ida ne’ebé boot teb-tebes. Situasaun jeral iha Timor-Leste ne’ebé afeta ba dezastre ida ne’e, ita iha Dili bele rona mos ami nia lian, rona mos ami nia susar iha postu ida ne’e”, dehan Natalino Martins.

Nia dehan hanesan Administrador Postu fo obrigadu wa’in teb-tebes ba grupu tolu, tanba ho vontade ne’ebé di’ak teb-tebes bele mai ajuda ona ami iha Postu Administrativu ida ne’e’, li-liu ba família sira ne’ebé afeta direitamente ba dezastre iha dia 4 abril liu ba.

Iha fatin hanesan Xefe Suku Manelima, Jorge Soares hato’o agradese wa’in ba grupu ne’e tan ho fuan bele tulun ona nia komunidade afetadu hosi dezastre ida ne’e. “Ha’u agradese boot tebes ho situasaun emerjénsia ida ne’e, grupu sira ne’e bele ajuda komunidade sira, tulun sira ho tempu ida hanesan ne’e.”

Apoiu hirak ne’e sei distribui ba komunidade afetadu hosi dezastre naturais iha Suku neen iha Postu Laclubar.

Apoiu ne’ebé grupu tolu ne’e oferese mak fos saku 500 (25kg), mie instant, masin pack 500, mina botir 1000, manu tolun. deterjen 3000, manta dos 3, sumasu dos ida, lensol dos ida, biti 115, sasan dapur no haris nian. Oferese mos roupa ba labarik em boot (feto no mane), sapatu no sasan seluk tan.

Print Friendly, PDF & Email

LEAVE A REPLY

Please enter your comment!
Please enter your name here