Reportazen Francisco JDA
“Hodi Archidiocese Dili nia naran atan hau ho haraik an, hakarak hatoo ami nia deskulpa ba akuzasaun no alegasaun sira ne’ebe publikamente hasoru”. Archebispo Archidiocese Dili, Dom Virgilio do Carmo da Silva SDB
Relasiona polemika ne’ebe mosu iha publiku konaba kazu hosi eis Padre. Richard Dascbach, liu hosi konferensia imprensa informa ba sarani tomak konaba uma kreda, partikularmente Archidiocese Dili nia pozisaun to’o mai iha momentu ida ne’e. Nunee ikus mai ezonera Padre Herminio de Fatima Gonsalves hosi nia kargu, nudar Diretor ba Departamentu Justica no Paz Diocese Dili nian no mos relatorio balun hosi Justica no Paz, ne’ebe iha indisiu ruma hatudu akuzasaun no alegasaun ruma, hasoru Ministeriu Publiku no parte investigasaun nian.
Liu hosi konferensia imprensa Archebispo Archidiocese Dili, Dom Virgilio do Carmo da Silva SDB hateten katak tau nafatin konfiansa tomak ba autoridade, polisia no estadu nian inklui ba sira hotu ne’ebe involve iha kazu Dascbach nian. Archebispo mos hakarak hatoo deskulpa ba hahalok ne’ebe hamosu desentendimentu iha publiku.
“Hodi Archidiocese Dili nia naran atan hau ho haraik an, hakarak hatoo ami nia deskulpa ba akuzasaun no alegasaun sira ne’ebe publikamente hasoru, sira ne’ebe involve iha investigasaun ne’e, uma kreda hakarak hofoun nia apoio no tulun ba vitima sira ne’ebe autoridade judisial sira sei deklara”, hateten Archebispo Archidiocese Dili, Dom Virgilio do Carmo da Silva Iha Camara Eclesiastica Lecidere, 06/010.
Archebispo Diocese Dili, Dom Virgilio do Carmo da Silva SDB hatutan dehan relatoriu Departamentu Justica no Paz nian la reflete opiniaun nudar Archebispo nian no sira nia relatorio mos hakat liu sira nia kompetensia, tan ne’e nudar Bispo deside atu ezonera Padre Herminio Goncalves de Fatima hosi nia kargu nudar Diretor Justica no Paz Dili nian.
Maske nunee uma kreda hafoun kontinua atu kolabora ho NGO hotu, nune’e mos organizasaun sosiedade sivil sira seluk atu fo apoio ba vitima sira, Vaticano liu hosi Munsetorio Apostoliku partilha atitude apoio hodi tau nafatin konfiansa tomak iha instituisaun demokratika no sistema judisial Timor-Leste nian.