Reportazen Santina Lucia da Costa
Fundasaun Alola ho slogan “Feto Forte Nasaun Forte” organiza feira Natal ne’ebe realiza kada ba grupu artezenatu ni industria kiik sira iha loron 12 Dezembro 2020. Feira sira ne’e hanesan kalendariu Annual ba Fundasaun Alola hodi halibur grupu no kompradores sira iha rai laran no rai liur.
Objetivu feria loron rua nia laran, atu promove produtu lokal ne’ebé grupu sira iha no mós prejerva identidade kultura Timor-Leste nian, fiar katak ida ne’e sei hasa’e rendimentu grupu ninian.
Ba jonalista sira Diretora Fundasaun Alola, Maria Imaculada Guterres hateten tinan ida ne’e atividade feira sei hetan partisipasaun husi grupu artezenatu hamutuk 60 resin, ne’ebe sei hatudu no fa’an ba publiku produtu hanesan Tais, boneka estatua, livru, kaixa, sanan rai, vazu aifunan, sabaun lokal, aihan lokal, kafé, mina Nú virjen, produtu husi plastiku reziklazen, agua matan no seluk tan.
“Fundasaun Alola iha inisitiva hala’o feira ne’e, tanba durante ne’e Fundasaun Alola liuhusi programa hakbiit ekonomia feto, ami fo kapasitasaun ba grupu lubuk ida, ami grupu 60 resin ne’ebe mak estabelese iha Munisipiu 12 inklui RAEOA no grupu sira ne’e hetan kapasitasaun kona-ba diversifikasaun produtu kona-ba oinsa bele promove produtu lokal ne’ebe mak sira iha”, hateten Diretora Fundasaun Alola, Maria Imaculada Guterres ba jornalista sira hafoin halo abertura ba Feria Natal, iha Edifisiu Fundasaun Alola, Mascarinhas, Dili, loron, 12/12.
Diretora Fundasaun Alola ne’e dehan iha objetivu boot ida mak atu bele fornese merkadu ba sira kada tinan, fó merkadu dala rua mak feira tinan klaran, feira paskua no feria natal.
“Grupu sira ne’ebe mak mai husi Munisipiu, ami apoiu ba balun ne’ebe kbiit laek tanba sira ne’e balun mai iha ne’e, antes horseik tiha ona, no balun mai duni ho sira nian rasik maibe ami nafatin fornese fatin, fatin ne’e ba sira kada tinan dala rua”, dehan Maria Imaculada Guterres.
Iha Fatin hanesan Deputy Thai Embassy iha Timor-Leste, Sakollawat Thongcharoen hateten iha tinan ida ne’e Fundasaun Alola kria feira natal, ida ne’e oportunidade laos atu ganha rendimentu , maibe asisti Fundasaun Alola nian ba dezenvolve kualidade produtu, haforsa tan abilidade merkadu no preserve kultura liuliu ba kultura tradisional iha Timor-Leste.
“Hau fiar katak inisiativa no atividades ne’e organiza husi fundasaun alola ida ne’e bele ajuda estatutu feto no labarik iha Timor-Leste ninian, hau mos fiar katak Fundasaun Alola serbisu no inspira ema iha Timor-Leste no komunidade, hau rekoñese katak, importansia ba feto, ekonomia ekonomia feto ba dezenvolve sustentabilidade espesial liu ba enkuadramentu ekonomia”, dehan Sakollawat Thongcharoen.
Nia enkoraja Fundasaun Alola kontinua halo esforsu ne’ebe mak di’ak, kontinua fó benefisiu ba feto Timor-Leste no Labarik, ba futuru kontinua serbisu hamutuk no susesu ba feria natal iha tinan 2020.
Iha fatin hanesan Vendores husi Grupu Viera Mar, Rosa Moreira Ratu husi Munisipiu Lautem akresenta katak mai tuir feira ida ne’e a hodi sustenta ami nia oan nia eskola no ami rasik selu transporte hodi lori ami nia sasan mai fa’an iha feria natal ne’ebe organiza husi Fundasaun Alola.
“Agora moras Covid-19 ne’e mosu fo impaktu tebes ba ami nia produtu, tanba ema malae turista sira laiha atu hola, laos hanesan uluk malae sira mai sosa barak. Iha Munisipiu Lautem, Suku Com, ne’e ami fa’an iha ne’eba hola tanba fatin Com ne’e area Turizmu, ema hola barak iha loron finadu, tanba ema barak ba iha ne’eba, ne’ebe loron rua ami hetan osan montante $100 to’o $ 200 dollar”, informa Rosa Moreira Ratu.
Grupu Viera Mar rekomenda ba Fundasaun Alola tinan oin, se bele aumenta tan loron tanba loron rua de’it ne’e balun hetan osan no balun la hetan