Home Meio Ambiente Grupu Ecosista Produs Lixu Hodi Kria Ekonomia Ne’ebe Fo Valor Ba Sira

Grupu Ecosista Produs Lixu Hodi Kria Ekonomia Ne’ebe Fo Valor Ba Sira

416
0
Grupu Ecosista produs botir matan sai pasta no raga. [Foto: Santina Lucia da Costa | 12.12.2020]

Reportazen Santina Lucia da Costa

“Hanorin fali komunidade sira, oinsa ita bele valoriza lixu tanba lixu ne’ebe dalaruma ema sente hanesan la vale, maibé iha sira grupu Ecosista sira foti lixu sira ne’e sai hanesan valor ne’ebe fo benefisiu iha ekonomia nian liuliu  ba iha negosiu”. Noviana da Freitas

Joven na’in neen hamosi idea kreativu no inovativu, hodi resikla lixu sai sasan ne’ebe bele uza fila fali.  Grupu Ecosista ne’ebe harii hosi jovem nain neen, kolleta motir plastiku nia matan, produs sai fali raga no pasta. Tanba tuir sira lixu ne’ebe dalabarak ema soe, bainhira uza hanoin ne’ebe kreativu bele sai fali sasan ne’ebe produs osan

Liuhusi Feira Natal ne’ebé mak organiza husi Fundasaun Alola, Grupu Ecosista partisipa iha Feira Natal hodi promove sira produtu ne’ebe mak iha.

Tuir Koodenadóra Grupu Ecosista, Noviana da Silva Freitas ba Neon Metin hateten Grupu Ecosista harii iha tinan 2016 no sira halo de’it mak raga.  Iha sira nia grupu ne’e seidauk dezenvolve, seidauk iha fatin, sira halo de’it iha sira nia uma Becora. Iha tinan 2017, 2018 mai to’o agora 2020 iha organizasaun balun ne’ebe mak komesa promove liu tan sira nia produtu resiklazen, sira mos fo treinamentu ba komunidade sira.

Sira hili naran Ecosista ho nia signifikante mak “haree ba ekolojia ambiental,” no sista katak, “Feto”, oinsa feto luta ba ambiental.

“Ami mai ho ideia ida ne’ebe kreativu, tanba ne’e ami senti katak problema lixu ne’e sai hanesan problema ne’ebe mak bele fo impaktu ba ita nia nasaun no mos global, tanba dalaruma ema hanoin katak, soe lixu ne’e hanesan problema baibain, maibe ba ami katak presija lixu ne’e, tanba ami iha grupu ne’e joven barak ideia kreativu, duke ita soe lixu hodi estraga ita nia ambiente.” hateten Koodenadóra Grupu  Ecosista, Noviana da Silva Freitas ba Neon Metin iha Ambitu Feria Natal iha Edifisiu Fundasaun Alola, Mascarinhas, Dili, Loron, 12/12.

Noviana akresenta sira halo  produtu ne’ebé mak sira kolleta husi lixu hanesan butir agua nia matan sira produz halo raga, pasta. sira kolleta botir nia matan liuliu iha fatin ne’ebé ema soe lixu ba, alende ida ne’e lixu ne’ebe mak ema soe barak liu sira kolleta iha instituisaun sira ne’ebé mak sira hemu tiha agua soe, no mos organizasaun ruma ne’ebe hemu tiha agua soe iha lixu sira foti.

Noviana dehan katuas no ferik sira ne’ebe mak hili lata aat,  fó serbisu ba sira, sira hili agua matan tau plastik boot ne’e nakonu sira fó mai, fo fali osan ba sira, hodi nune’e sustenta fali sira nesesidade. Resiklazen katak lixu sai hanesan valor ida ba negosiu, tanba ne’e karik utiliza produtu ruma presiza labele soe, karik ita bele halo fali buat foun nune’e fó valor ba ekonomia.

Nia afirma dalaruma joven barak hanoin katak, serbisu laiha maibe serbisu ne’e iha husi ita nia-aan rasik, kria empregu ba ita nia-an, ita mai ho ita nia ideia kreativu, dalaruma ema haree lixu ne’e sasan ne’ebe foer no la vale buat ida. Kria serbisu laos depende de’it ba fatin seluk maibe husi ita nia-an rasik, agora era-globalizasaun iha mos teknolojia hanorin ita atu utiliza.

“Ami nia grupu la tuir treinamentu ida, ami mai ho ideia rasik nune’e mos hetan motivasaun balun husi kolega balun iha Indonesia sira mai fo hanoin ami.” tenik Noviana.

Noviana ho idade 27 akresenta liuhusi atividade ne’ebe mak sira halo, liuliu kona-ba resiklazen ninian oinsa atu hanorin fali komunidade sira, oinsa ita bele valoriza lixu tanba lixu ne’ebe dalaruma ema sente hanesan la vale, maibé iha sira grupu Ecosista sira foti lixu sira ne’e sai hanesan valor ne’ebe fo benefisiu iha ekonomia nian liuliu  ba iha negosiu.

Tanba ne’e liuhusi atividade feira hanesan parte ida promove liu tan sira nia produtu resiklazen, atu nune’e bele atrai  liu tan kliente sira, nune’e mos atu hanorin no fo hanoin ba komunidade no ema sira ne’ebe mak sosa sira nia produtu.

“Tinan rua ba kotuk, ami halo uluk raga, ema hola barak liuliu iha loron finadu, tanba dalaruma iha ami nia kolega balun hola sira promove fali lori ba Munisipiu, karik ema hakarak hola fo hatene fali ami, ami halo tan, nune’e mos ami nia kolega balun ami fo gratuitu, ami fo gratituitu, ami hakarak promove liu tan ami nia produtu atu nune’e ema seluk bele hatene ne’e para sosa ami nia produtu ne’e.” hateten Noviana.

Noviana informa katak ema estranjeiru sira hola mos sira nia produtu, liuliu iha feria foin dadauk iha Timor-Plaza, ami nia produtu ne’e fa’an, ho presu mak hanesan, raga boot presu $ 50 dollar, raga ki’ik  liu $ 5 dollar, raga natoon $ 6 dollar no $ 10 dollar, se ema hakarak hola ami bele hatun nia presu.” Konfesa, Noviana ba Neon Metin

Nia hatutan Husi feira ne’ebe mak sira tuir liu ona,  seidauk hetan osan montante $ 100 dollar, sira só hetan de’it mak $ 50 dollar, “ba ami atu hetan uituan ka barak ami nafatin kontenti, tanba ami maioria joven serbisu ho voluntariu, osan ne’ebe mak ami hetan hola fila-fali material, no balun hola fali hahan ami han hamutuk de’it”.

Grupu Ecosista rekomenda ba Sekretariu Estadu Meiu Ambiente (SEA) kria regulamentu ida, liuliu ba eskola no Instituisaun sira, bainhira halo atividade ruma no hemu agua karik, agua mamuk labele soe, se bele tau iha fatin ida, atu nune’e ami bele ba foti, hodi nune’e ami bele produz dezenvolve ami nia grupu.

Nune’e nia mos husu ba SEA koordena ho kada Ministeriu sira, promove ami nia produtu ne’ebe agora dadaun ami halo, tanba dalaruma iha feira mak ami bele partisipa hodi fa’an ami nia produtu sira ne’e, presiza kria merkadu ba grupu sira ne’ebe mak produz resiklazen, maioria halo husi lixu tanba ita foin iha de’it merkadu ba Tais Market.

Membru hosi grupu Ecosta rasik hamutuk nain neen, iha feto nain 3, mane nain 3 iha estudante universitariu no balun finalista.

Print Friendly, PDF & Email

LEAVE A REPLY

Please enter your comment!
Please enter your name here