Home EduTek Blue Action Group Ensera Formasaun Feminista Rezilensia Hasoru COVID-19

Blue Action Group Ensera Formasaun Feminista Rezilensia Hasoru COVID-19

421
0
Koordenadora The Blue Action Group iha enseramentu. [Foto: Copyright Nilda | 14.12.2020]

Reportazen Adroaldo ‘Saretukau’

The Blue Action Group ka Grupu Asaun Azul realiza eventu publiku relasiona ho Feminista Rezilensia Hasoru COVID-19 no objetivu hosi eventu refere hodi ensera mos atividade the The Blue Action Group halo ona hanesan formasaun Digital Literacy no Open Space Methodology.

Iha abertura ba eventu publiku Koordenador Grupu Asaun Azul, Marilia Oliveira da Costa hateten treinamentu ne’e organiza atu halibur juventude sira hosi organizasaun oi-oin, atu hamutuk sai ida de’it no laiha diskriminasaun.

Nia hatutan objetivu hosi treinamentu ne’e mos bazeia ba situasaun surtu COVID-19 ne’ebé mak afeta mundu to’o mai Timor-Leste, tan ne’e mak Grupu Asaun Azul iha inisiativa atu harii, hodi serbisu hamutuk ho organizasaun seluk atu oinsá prevene surtu COVID-19 ne’ebé mak akontese iha ita nia nasaun.

“Situasaun emerjénsia akontese, iha situasaun barak ne’ebé mak halo komunidade no populasaun la halo movimentu, ida ne’e impaktu ba sira liu-liu tenki para servisu no barak liu mak hela iha uma de’it, entaun akontese violénsia sira hanesan deskriminasaun ne’ebé mak hasoru hosi ita nia maluk sira no ba komunidade sira,” dehan Koordenadora Marília iha serimónia enseramentu ba treinamentu Feminista Rezilénsia iha Asosiasauk HAK, Farol 12/12.

Koordenadora ne’e hatutan treinamentu ne’e hodi loke oi-tuan partisipante sira nia hanoin, hodi fahe saída mak durante ne’e sira sente no bele espresa sai, atu nune’e bele halo prevensaun iha sira nia aan rasik, família no komunidade.

Nia hatutan liu hosi treinamentu ida ne’e partisipante bele espresa saída mak sira sente hanesan violensia doméstika, diskriminasaun ne’ebé hasoru iha komunidade no sira nia aan, liu hosi grupu diskusaun.

Marília dehan nune’e mos iha treinamentu konabá uza metodolojia Espasu Nakloke, hodi identifika issue ka konflitu ne’ebé durante ne’e komunidade sira hasoru bazeia ba saída mak sira hetan. Hosi ida ne’e partisipante sira aprezenta fali rezultadu hosi saída mak disikuti ona hodi buka nia solusaun.

“Ita mos halo drama ba iha situasaun COVID-19 nia laran, saída mak ita nia maluk sira hasoru liu-liu ita nia maluk LGBTI sira, ema ho difisiénsia, inan feton sira ne’ebé mak hasoru situasaun sira ne’ebé ita la espera, maibé akontese da-dauk iha ita nia nasaun Timor-Leste,” dehan Kordenadora Marília iha Asosiasauk HAK, Sábadu, 12/12.

Nia hatutan tanba ne’e mak haree di-diak konabá Feminista Rezilénsia Ne’ebé Hasoru COVID-19, ne’ebé ita haree atu oinsá feto sira forsa, vontade iha ho hanoin ida atu hatudu sira nia aan katak sira mos bele halo prevensaun ba sira nia aan, nune’e violénsia no deskriminasaun sei la mosu ba sira.

Iha parte sorin partisipante hosi organizasaun Movimentu Feto Foinsa’e (MOFFE), Domingas Ximens Belo apresia tebes ho programa ne’ebé grupu Asaun Azul organiza, tanba liu hosi ne’e nia bele aprende oinsá uza sosial média ho lolos no ajuda nia atu iha hanoin krítiku.

“Ami aprende oinsá ami hasai informasaun ne’ebé real no ami bele indetifika informasaun ne’ebé la los hodi labele fahe tutan ba maluk seluk”, dehan Domingas iha enseramentu treinamentu Feminista Rezilénsia Ne’ebé Hasoru COVID-19, sábadu, 12/12.

Nia sente kapas tebes tanba sira halo prátika no aprezentasaun vídeo nomos halo drama liu hosi vídeo, hodi fo komentáriu, sujestaun no rekomendasaun, ida ne’e tulun tebes nia.

Domingas husu atu programa ida ne’e kontinua nafatin, hodi bele tulun tan joven sira seluk ne’ebé seidauk iha koñesimentu konabá aktividade sira hanesan ne’e.

Iha enseramentu ne’e partsipante sira mos halo drama parsipatoriu konaba stigma no diskriminasaun hasoru komunidade LGBTI no kaben sedu iha propagasaun COVID-19. Hosi drama ne’e ativisita, juventude inklui onganizasaun seluk ho antuajiazmu halo komentáriu, hosi sira nia observasaun ba drama refere hodi fo sira nia hanoin krítiku, rekomendasaun no fo solusaun tuir sira nia prespektiva.

Partisipante sira ne’ebe tuir formasaun hosi the Blue Action mai hosi Casa de Rose, MOFFE, Endure Crew, Working Woman Center Timor-Leste (WWCTL), ADTL no media RENETIL – Neon Metin. Treinamentu ne’e rasik fasilita hosi Koordenadora Grupu Asaun Azul, Marília Oliveira da Costa no Konselleira Grupu, Zevonia Vieria.

Print Friendly, PDF & Email

LEAVE A REPLY

Please enter your comment!
Please enter your name here