Home EduTek DPC Realiza Expozisaun Fotografia Daruak Ho Tema Saida Mak Esperansa

DPC Realiza Expozisaun Fotografia Daruak Ho Tema Saida Mak Esperansa

420
0
DPC realiza expozisaun fotografia. [Foto: Marcio Morato | 14.12.2020]

Reportazen Marcio Morato Pinto

Dili Photography Community (DPC)  realiza expozisaun ba daruak nian ho objetivu hodi orienta fotografu sira deskrobe konnesimentu no kreatividade sira nian iha area fotografia, liuliu ba membru foun sira, atu bele sai membru permanente iha Dili Photography Community (DPC).

Prezidente DPC, Ali Baba iha expozisaun hateten exposisaun DPC sai hanesan programa anual ne’ebe realiza dahuluk iha loron 15 Abril 2019 ho nia sub-tema “Esperansa Mak Ikus” no iha tinan 2020, ho sub tema “Saida Mak Esperansa”.

DPC ne’ebe harii iha tinan 2013 nu’udar mahon ida, atu halibur foinsae sira ne’ebe iha paixaun ba fotografia, hodi aprende diak liu tan iha area arte fotografia nian, ho objetivu atu hasae konhesimentu foinsae sira nian konaba fotografia no hametin amizade hanesan familia kiik, ho hanoin ida atu explora turismu lokal hodi promove beleza Timor nian, Kultura no halo kontrolu ba aspetu oi-oin.

“Durante ezistencia DPC, ami konsege halo exposisaun ba dalarua, ida iha Embaixada Portugal no ida seluk iha Fundasaun Oriente. Fundus hosi aktiviadades hetan hosi Fundasaun Oriente, Komisaun Eropeia no balun ami la temin naran. DPC mos hetan apoio hosi fundasaun Falur Rate Laek ne’ebe fó ona fatin ba DPC atu tau gallery sira ne’ebe maka iha”, hateten Ali Baba, iha Fundasaun Oriente, 12/12.

Nia hatutan DPC nia membru hamutuk 48 ne’ebe badinas lao hodi hasai foto, maibe entre membru hirak ne’e iha 17 mak liu iha selesaun ida ne’e. Total fotografia ne’ebe iha hamutuk 34.

Ali hatutan rezultadu hosi expozisaun no fundus sei uza ba atividade akampamentu ne’ebe sei halao durante tinan 5 iha Atauro, ho objetivu atu hasae konsiensia Joven sira nian iha asuntu protesaun ambiente, iha Workshop konaba prezervasaun bee matan, Permakultura no fasilita mos formasaun sira.

“Kontinuasaun ba objetivu exposisaun ida ne’e sei halao iha Atauro ho obejtivu atu fó esperansa ba grupo kiikoan ne’ebe maka serbisu voluntario, ho hanoin ida atu fó tulun ba sira haforsa sira nia aktividades voluntarismu ho diak” dehan Ali Baba.

Iha entrevista ketak ho jornakista Neon Metin, Presidente DPC hateten DPC hili liafuan Esperansa tamba hakarak fó fila ka Giving back buat ne’ebe sira halo, liu husi obra sira nian atu fó fali esperansa ba ema bainhira hare produtu figura ne’ebe sira iha.

“Liu hosi Exposisaun ba fotografia ne’ebe iha, ami fan fila fali ba ema ne’ebe maka iha esperansa boot, hodi tulun fila fali maluk sira seluk ne’ebe presisa tulun. Ami mos gasta ami nia tempo, gasta ami nia osan, ami husik aktividades familia nian hodi lao ba buka figura sira ne’ebe maka iha. Foto sira ne’ebe ami fan, osan ne’e sei tulun fali ema seluk ne’ebe presisa tulun”, dehan Presidente.

Ba Neon Metin fotografer, Ana Judit da Costa ne’ebe mos tama iha selesaun fotografu ba expozisaun konfesa katak, bainhira sei idada labarik iha ona mehi, atu sai fotógrafe no ohin mehi ne’ebe nia iha hetan duni iha expozisaun refere.

Iha tinan 2014 nia hahu envolve an iha DPC, hodi aprende no simu formasaun ruma ne’ebe uma mahon iha. No iha tinan 2020, hetan oportunidade husi DPC, maske oportunidade ne’ebe nia hetan iha limitasaun no difikuldades oioin maibe nia hakas an nafatin atu desenvolve no hasae ninia konhesimetu iha area Fotografia nian. Iha selesaun ba dahuluk nia la liu, maibe nia nafatin badinas lori ninia atributus digital hodi lao iha fatin ne’ebe maka nia observa atu foti ninia figura, ho objetivu atu hatudu ninia professionalismo no la tauk atu tuir kompetisaun badaruk iha area Fotógrafe nian.

“Entre figura 100 resin, ida maka foin liu iha Exposisaun Esperansa ba daruak. Figura ne’ebe hau foti hau hein hahu iha horas 3 nia laran, signifikado hosi Figura ne’ebe hau foti iha Venilale, hatudu avo ne’e moras hela no nia tur hanoin barak, tau liman iha nia ulun, nia matan mos hateke ladun hetan, bainhira loron matan hahu fó naroman no fó manas, iha neba kedas maka Avo ne’e mos bele sente katak nia sei bele moris no nia sei iha esperansa ba loron ohin, liu husi loron matan nia naroman no nia manas ne’ebe kona Avo ne’e”, dehan Ana ba Neon Metin.

Ana Judit rekomenda ba feto maluk sira ne’ebe maka iha talentu hasai foto, atu labele subar maibe koko atu hatudu maske simu komentario negativu oioin husi ema seluk.

Presidente ba exposisaun ba daruk agradece ba Bernardino ne’ebe maka durante ne’e suporta no fahe matenek ne’ebe nia iha ba maluk fotógrafo sira no agradese mos ba Uniaun Eropeia, Institutu Camões no Fundasaun Oriente ne’ebe maka fó tulun ba sira, hodi Facilita imprime fotografia sira ne’ebe maka iha ho diak.

Entretantu, DPC loke nafatin oportunidade gratuita ba ema se deit ne’ebe hakarak aprende no promove talentu fotografia nian no DPC iha esperansa boot atu Feto sira bele envolve an barak iha arte fotografia nian.

Print Friendly, PDF & Email

LEAVE A REPLY

Please enter your comment!
Please enter your name here