Reportazen Zevonia Vieira
“Durante sesta bazika hau hetan lukru makaas, loron ida hau hetan $200”. Negosiante Kiik Eulalia
Eulalia Marques haksolok tebes tanba produtu ne’ebe nia produs hanesan Bolu, dosi maran no kripik sira neebe nia hatama iha loza agrikultura Fatuhada, tanba nia nudar negosiante kiik, nia ai-han sira ne’ebe nia halo rasik tama mos iha programa sesta bazika, ho nune’e kompania ne’ebe implementa programa sesta bazika bele fahe ba benefisiariu sira.
Bainhira Neon Metin halo observasaun direita iha loza agrikultura, Eulalia Marques aruma hela nia bolu, dosi maran no kripik sira iha loza agrikultura no benefisiariu ne’ebe lori voucher sesta bazika nian, foti mos Eulalia nia produtu.
Ba Neon Metin Eulalia hateten nia halo negosiu kiik ne’e hosi kedas tinan 2015 no partisipa iha feira sira ne’ebe Ministeriu Turismo, Comersiu no Industria (MTCI) halo, hodi nune nia bele faan nia produtu kontente tanba hahan ne’ebe nia tau iha loza agrikultura, durante sesta bazika nia produto hetan folin boot.
“Hau halo negosiu halo dosi hanesan bolu, dosi maran ho kripik sira. hau la involve iha grupu kooperativa ida, maibe hau mesak halo duni hodi ajuda hau nia uma laran. Hahu halo negosiu nee hosi tinan 2015, hau mai faan iha loza agrikultura foin lalais iha tinan 2019, antes ne’e hau babain tuir feira ne’ebe MTCI halo”, hateten Eulalia
Eulalia hela iha Becora ba Neon Metin, mai hosi familia simplis hatene oinsa harii ekonomia uma laran, no lakohi atu depende ba ema hodi hetan osan. Nia hateten nia halo negosio ne’e hodi tulun nesesidade uma laran nian, dalan ne’e mak bele ajuda nia hodi resolve ekonomia uma laran. Nia konfesa antes sesta bazika nia ai-han sira ne’ebe hatama iha loza agrikultura loron ida bele hetan deit $30-$50 maibe bainhira programa sesta bazika ne’e hahu, nia hahan sira hetan lukru boot loron ida hetan $200 tanba benefisiariu sira foti mos nia aihan hirak ne’e.
“Hau faan torta, bolu, dosi maran no kripik, iha loron bailet ne’e hau hatam etu ka hahan lokal sira. antes sesta bazika ne’e rendimentu loron ida la hetan barak, dala ruma hetan deit $30-$50. Durante sesta bazika hau hetan lukru makaas, loron ida hau hetan $200”, hateten Eulali ho laran kontente iha loza agrikultura, 30/12/2020.
Nia afirma katak loza agrikultura ajuda tebes nia, tanba loke dalan ba nia hodi mai rai nia ai-han sira iha ne’e no mos oportunidade ba nia, hodi tama iha program sesta bazika, “hau kontente tebes ho programa sesta bazika ne’e tanba ajuda hau hanesan negosiente kiik, tanba tulun hau hetan lukru boot. Negosiu ne’ebe hau halo no hola parte iha sesta bazika, hau kontente tebes ajuda nesisdade uma laran”.
Produtu ka ai-han sira ne’ebe durante ne’e hatama iha loza agrikultura iha Fatuhada no Plaza Timor, nudar produtu hosi toos nain timoroan sira no negosiante kiik timoroan sira, no rezultadu hosi sasan sira ne’ebe loza agrikultra faan, osan hirak ne’e sei fo direita fali ba toos nain no negosiante sira.
Programa sesta bazika nudar programa hosi rekuperasaun ekonomia bainhira virus Corona afeta mai Timor iha fulan Marsu 2020 no iha tempu estadu emerjensia ne’ebe afeta ba ekonomia rai laran, liu-liu grupu agrikultur.