Reportazen Francisco JDA
Komunidade afeitadu suku Kaikoli, aldeia zero 01 ho Rede ba Rai (RbR), hato’o keixa ba Ministeriu Públiku (MP), relasiona ho komunidade nia prekupasaun ba notifikasaun hosi Ministeriu Justica no linguajen ultimatu hosi Comisariu PNTL.
Koordenador Nasionál RbR, Hortencio Pedro Vieira ba jornalista sira hateten, adjuntu prokurador konsidera komunidade nia preokupasaun atu ema hotu tenki iha lei nia okos, nunee nasaun ka estadu ne’e labele polítika mak sai fali panglima ba asuntu lei nian maibé lei mak tenki iha leten.
“Comisariu dehan fo ultimatu ba loron 10 para komunidade bele sai hosi sira nia hela fatin atu ezekuta ona planu harii edifisiu PNTL, ho ida ne’e komunidade sira tauk tanba sira kbiit laek no vulneravel, la dun iha konnesimemtu di’ak oinsá atu luta ba sira nia direitu justica ba dalan legal, entaun Rede ba Rai ami nia dever atu atu hare ema vulneravel sira ne’ebé sente ameasadu hosi asaun ilegal sira, ohin adjuntu dehan, ema hotu labele halo aksaun la tuir lei ne’ebé vigora”, hatete Koordenador Nasionál RbR Hortencio Pedro Vieira, iha Prokurador Jerál Kolmera, 23/02
Rede ba Rai dehan keixa ida ne’e ba Ministeriu Justica, ne’ebé hasai notifikasaun ho komisariu PNTL no Diretor Jerál Diresaun Nasionál Terra no Propriedade (DNTP), tanba komunidade sente katak ida ne’e sira halo asaun ne’ebé illegal, no la konsidera sidadaun ne’ebé hakarak moris iha justica nia laran.
“Ida ne’e keixa krime maibé ohin adjuntu fo hanoin katak di’ak liu halo keixa sivil, tanba ne’e sei iha relasaun ho sivil nian, maibé komunidade hamutuk ho Rede ba Rai sei liu hosi dalan barak, aleinde ida ne’e ami sei ba hasoru komisaun A Parlamentu Nasionál, ba PDHJ no audensia ho Prezidente da Repúblika, nune’e poder hotu mak tenki la’o ho dalan legal”, hateten Koordenador Nasionál Rede ba Rai
Iha fatin hanesan komunidade afetadu Kaikoli, Maria Expostu ba jornalista sira hateten nudar timoroan prontu kontribui ba dezenvolvimentu, maibé tenki tuir dalan legal no justu tanba durante ne’e saida mak ami husu sira nunka atende.
“Alargamentu PNTL husu ami nia Kintal ida ne’e, ha’u sente la dun justu oituan tanba durante ne’e buat ne’ebé mak ami husu sira nunka atu atende, so sira nia hakarak mak kona ba uma no ai horis, kona ba rai sira la atende tanba lei ba rai seidauk iha, ha’u nia rai mak ida ne’e de’it ona, se fo tan ha’u la iha rai”, hatete Maria Expostu