Reportazen Bernarda da Costa*
Trabalador hamutuk 230 resin halai ses husi sistema, hodi ba serbisu fali iha kompania seluk ne’ebe laos serbisu hamutuk ho governu Timor-Leste.
Sekretario Estado Formasaun no Profisional, Alarico de Rosario hateten traballador hamutuk 230 resin ne’ebe halai ses husi sistema ne’e, sei iha prosesu nia laran tanba governu koko meius oioin hodi koalia ho sira liu husi video call, komunikasaun husi governu Timor-Leste ho Australia no mos komunika ho Embaixada Timor-Leste iha Australia .
“Oinsa iha tempu badak sei haruka pedidu ba, tanba durante ne’e pedidu ita halo nomeasaun tiha ona, maibe pedidu seidauk haruka ba to’o agora ho razaun tanba ita nia transporte laiha, situasaun ida agora la hanesan uluk”, dehan Alarico iha salaun SEFOPE-Kaikoli 23/02.
Alarico husu ba trabalador sira ne’ebe atu aranka aban ba Austrlia ,labele halo tuir traballador sira ne’ebe mak hahalok ladiak, tanba sai husi ne’e ita iha komprimisiu dehan hadomi rai Timor no familia.
Governu Timor-Leste serbisu hamutuk ho governu Australia, ema sira ne’ebe mak serbisu iha agensia sira tuir regras tenke asina akordu ida entre governu ho governu, agensia ho traballador sira, para governu bele kontrola ne’e ho diak.
“Traballador ida ne’ebe mak ita trata ho dignu miabe to’o iha Australia sira halai sai husi sistema ba serbisu fali iha fatin seluk, maibe sei iha prosesu laran hanesan governu Australia ho governu Timor-Leste koko trata ida ne’e atu ba futuru labele akontese tan”, hatutan Alarico.
Nia konklui SEFOPE iha planu atu haruka ekipa hodi halo monitorizasaun hodi hare konaba situasaun ne’e hodi buka tuir, maibe situasuan COVID-19 sei labele halo viajem ba Australia.
*(Bernarda da Costa nudar estudante UNTL ne’ebe halo estajiu iha Neon Metin)
