Home Notisia PM: Aviaun VH-IJL Hetan Autorizasaun Hodi Tun, Lere: Tenki Investiga Tanbasa Mina...

PM: Aviaun VH-IJL Hetan Autorizasaun Hodi Tun, Lere: Tenki Investiga Tanbasa Mina Maran

226
0
Aviaun marka VH-IJL Learjet LJ60 Australian para iha aeroportu Preziente Nicolau Lobato. [Foto: copyright FB | 14.01.2021]

Reportazen Santina Lucia da Costa

Aviaun marka VH-IJL Learjet LJ60 Australian nian, ne’ebe semo hosi Brisbane Australia ba Indonesia-Jakarta hodi tula pasiente COVID-19 ida iha Jakarta, hodi tula fila ba Brisbane maibe aviaun refere hetan problema tanba avtur (mina) aviaun nian menus ona, no pilotu desida hodi tun emerjensia iha aero porto Prezidente Nicolau Lobato, hodi husu autoridade Aviasaun Timor-Leste nian ense avtur ba aviaun refere, iha loron 12/01, oras tuku 17:30.

Ho akontesementu refere iha palacio prezidensia Primeiru Ministru, Taur Matan Ruak esplika katak bainhira aviaun refere nia avtur komesa menus no Autoridade Aviasaun Timor-Leste (AACTL) ense mina maibe sira mos hasoru problema seluk tanba bainhira atu aranka roda aviaun haat kuak hotu no sira labele kontinua viajem ba Australia

“Saida mak ita halo iha tempu refere, iha medidas rua mak hanesan aviaun ne’e hases-an husi pista, atu nune’e aviaun seluk mai tun karik bele tun, segundu halo apoiu umanitariu ba moras ne’ebé iha aviaun laran no mós pilotu sira”, hateten Primeiru Ministru, 14/01.

Primeiru Ministru hatutan Ministeriu Saude, Ministeriu Interior, Ministeriu Negosiu Estranjeirus (MNEK),no Ministeriu Transporte no Komunikasaun sira hotu halo esforsu para fó apoiu masimu no tenki iha kondisoens diak para ba fila-fali sira nia fatin.

“Hau espera katak sira nia situasaun bele rezolve ona, sira bele ba fali fatin ne’ebé sira ba. Aviaun ne’ebé mak tun, sira iha autorizasaun para tun, tanba sira iha problema ho mina. Aeroportu ne’e Internasional, ne’ebé iha situasaun emerjensia no presiza apoiu ruma, ne’e regra Internasional nian. Aviaun tun iha ne’eba ne’e, ne’e normal akontese”, hateten Primeiru Ministru.

Entretantu Xefe Estadu Maiór Jenerál FALINTIL- Forsas Defeza Timor-Leste (F-FDTL), Lere Anan Timur, hateten, aviaun ho marka VH-IJL Learjet LJ60, tun iha aeroportu internasional Nicolau-Lobato, Dili, Timor-Leste tanba nia mina laiha, mina laiha ne’e laos justifikasaun ne’e kalkulu ona.

“Indonesia semo mai to’o Timor-Leste ne’e, mina litru hira ne’e nia hatene ona, ne’e hau la fiar. Mai ense tiha mina, atu semo roda kuak tan, agora roda ne’e laos kuak ida de’it, roda haat ne’e kuak dala ida”, lamenta, Maijór Jeneral F-FDTL, Lere Anan Timur ba jornalista iha Palasiu Prezidensial Nicolau-Lobato, Kuarta-feira, 13/1.

Lere Anan Timur husu ba governu labele taka matan ba ida ne’e, liuliu Polisia sira hodi tau matan no tenke investiga, “aviaun ne’e moras ida iha laran, tenki investiga, tanba saida mak mina maran, tanba saida mak atu semo roda kuak, labele husik de’it hanesan ne’e, Timor ne’e nasaun soberanu ida, ne’e laos merkadu ida no laos diskotek ida ema narak tama arbiru de’it, ne’e kestaun dignidade kestaun soberania ita nian”.

Iha parte sorin Komandante Jeral PNTL, Komisariu Faustino da Costa dehan aviaun VH-IJL Learjet LJ60, dada sai ona husi piska, tuir akordu ne’ebé halo ho operadór ka pilotu.

LEAVE A REPLY

Please enter your comment!
Please enter your name here