Reportajen Silvino Freitas
Sekretária Estadu Juventude no Desportu (SEJD) asina nota kooperasaun ho Programa Nasoens Unidas ba Dezenvolvimentu (PNUD) hodi implementa programa Youth Employment Entrepreneurship Skill (YEES) ba joven sira hanesan fó formasaun, akonselamentu oinsá buka servisu, mentorin hodi dezenvolve kareira, edukasaun finanseira, apoiu inisiativa negosiu no dezenvolve sira nia negosiu.
Sekretariu Estadu Abrão Saldanha hateten, husi kooperasaun nee atu tulun foinsa’e sira, transfere esperénsia no konesimentu sira husi UNDP ba administrasaun SEJD nian nune’e bele servisu ne’ebé di’ak liu ba foinsa’e sira, area iha kooperasaun ne’e di’ak tebes ba nesesidade ne’ebé foinsa’e sira ohin loron iha, tanba sira iha problema maka hakarak buka empregu maibé atu hahú oinsá.
“Sira iha osan uituan maibé sira la hatene atu oinsá hahú negosiu, agora ita iha formasaun kona-ba ida ne’e finansiamentu no seluk tan mak atu halo mentorin ba sira nia kareira, kapasidade emprendedór oinsa atu hahú negosiu” dehan Abrão iha salaun-magna Lesidere, (03/05).
Nia dehan, husi kooperasaun ne’e sei la hela de’it ho asinatura maibé sei hein rezultadu mudánsa ba joven sira iha Timor-Leste laran tomak, nune’e SEJD agradese ba tulun husi UNDP, tanba ne’e governu Timor Leste iha ambisaun bo’ot hodi hein rezultadu husi implementasaun programa refere.
“Ha’u kompromete ha’u nia an karik situasaun ne’e la’o di’ak governu hakarak tama ho modelu ida ne’e, hau hakarak ho asisténsia husi governu nian ita bele halo espansaun ba munisípiu sira seluk mós” dehan Abrao.
Nia salienta tan, SEJD iha disponivel bo’ot atu apoiu nia rekursu tomak ba implementasaun programa ida ne’e no implementasaun ne’e sei hala’o iha Likisá, Ermera, Dili no Baucau, enkuantu Likisá halo reselesaun ba funsionáriu sira ne’ebé iha kapasidade atu apoiu implementa projetu ida ne’e, Baucau iha ona ekipa joven ne’ebé bele apoiu implementasaun ba projeitu ida ne’e, Ermera iha mós kapasidade di’ak atu implementa no Dili iha kapasidade no espasu ne’ebé di’ak atu implementa.
Enkuantu kooperasaun programa YEES ne’e UNDP sei implementa hamutuk ho Instituto Apoiu Dezenvolvimentu Emprezariál (IADE), SEJD, Ministru Turizmu Komersiu no Industria (MTCI) no Sekretariu Estadu Formasaun Profisionál Empregu (SEFOPE) iha sentru juventude haat hanesan Plataforma projeitu ida ne’e nian.
