Ministeriu Saude rejista tan kazu foun konfirmadu pozitivu COVID-19 iha aldeiaOnu-Laran, Suku Maudemu postu Tilomar.
Liu husi konferensia imprensa Koordenador Forsa-Tarefa ba Prevensaun no Mitigasaun Surtu COVID-19 iha Timor-Leste, Dr. Rui Maria de Araújo ba jornalista sira relata Ministeiru Saude (MS) rejista tan kazu Konfirmadu Pozitivu nain rua. Husi nain rua ne’e familia uma laran ho estensionista ne’ebe pozitivu uluk iha aldeia Onu-Laran, Suku Maudemu postu Tilomar.
Dr. Rui esplika estensionista ida ne’ebé hela iha aldeia Onu-laran, suku Maudemu, Postu Administrativu Tilomar, ne’ebe horseik konfirmadu pozitivu, hosi atividade ne’ebe ekipa vijilansia buka-tuir ema ne’ebé halo kontaktu-besik ho estensionista ne’e, horiseik loron 27 Fevereiru, ekipa saúde rekolle total 90 amostras iha fatin 4 hanesan aldeia Klauhalek, aldeia Belulik Kra’ik iha Postu Administrativu Fatumea, Aldeia Onu-Laran, Suku Maudemu, Postu Administrativu Tilomar, Suai vila.
“Husi amostra hirak ne’e seidauk halo hotu análize, maibé husi 47 amostra ne’ebé halo ona análize laboratóriu, ita rejista tan kazu konfirmadu nain 2”, dehan Dr. Rui ba jornalista sira iha Sala Situasaun Centro Integradu Jeataun Krize (CIJK) iha CCD Merkadu Lama 28/02.
Nia haktuir kazu konfirmadu nain rua ne’e, ema familia uma-laran (aman, inan no oan) husi estensionista, iha sira nia uma laran iha ema nain sia (9). Ida ne’e signifika husi ema nain ualu (8) seluk ne’ebé iha uma laran, nain rua deit maka konfirmadu hetan kontájiu, ka 25% (Household Secondary Attack Rate).
“Ho tan kazu konfirmadu rua ne’e, signifika iha munisipiu Covalima iha ona ‘’Cluster’’/agrupamentu kazu konfirmadu rua. Dehan ho liafuan seluk, ‘’Cluster’’ Klauhalek, hahoris tan, ‘’cluster’’ Onu-laran. Ita hein cluster Onu-laran. sei la hahoris-tutan cluster seluk”, nia esplika.
Nia mos subliña husi kazu konfirmadu foun nain rua ne’e, ida estudante Kintu Ano ho idade 10 anos, iha eskola Basica Central, Salele Tilomar. Ekipa saúde koordena ona ho autoridade relevante sira, hodi buka tuir dadaun ona kolega turma no mós kolega halimar husi estudante ne’e rasik, no ekipa vijilansia sei foti mos amostra professor turma , kolega Turma, kolega halimar hamutuk husi estudante ne’ebe konfirmadu ona, hodi bele halo analiza iha laboratoriu.
Entertantu dadus kazu konfirmadu oun 2, kazu Rerkuperadu nain 1, kazu ativu baixa nain 23 no ema tama husi fronteira iha loron 25 to’o ohin liu husi dalan regular hamutuk 17 no liu husi dalan Iregular hamutuk 11, sira hotu tama iha kuarentina.
