Reportazen Zevonia Vieira
Sala Situasaun Centro Integradu Jestaun Krize (CIJK), ohin loron 11/03 kontinua relata progresu atividade prevensaun no mitigasaun surtu COVID-19 iha municipio Dili, ne’ebe detekta iha kazu foun hamutuk 12 no Fatumea-Covalima iha kazu foun nain 2.
Hatan ba perguntas hosi Neon Metin relasiona ho CIJK iha ona dadus konkrit konaba maluk sira ne’ebe konfirmadu COVID-19 hare hosi idade ho sexu, no ema ne’ebe iha risku boot nia laran? Ba Neon Metin Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo hatan katak dadus iha maibe CIJK sedauk halo analiza ba asuntu ne’e.
“Agora Importante mak buka tuir sira ne’ebe halo kontaktu besik ho pozitivu sira para ita izola hotu”, dehan Dr. Rui iha CCD, 11/03.
Relasiona ho ventilator sufisiente ka lae? Hodi garante sekarik iha pasiente ne’ebe grave liu? Ba Neon Metin Dr.Rui hateten ventilator iha ospital Lahane prepara hotu ona para atu repsonde.
Tuir dadus ne’ebe rekolla ona hosi horseik to’o ohin loron hodi buka tuir kontaktu besik iha tan kazu foun hamutuk 12 mak pozitivu. Pozitivu nain 1 kontaktu besik hosi kazu Bebonuk, pozitivu nain 8 kontaktu-besik husi kazu sira SEFOPE, pozitivu 2 kontaktu-besik ho kazu Ministerio Finansas & Ministériu Transportes e Comunicação, pozitivu 1 iha aldeia 4 de Setembru, Tasi Tolu, Dili.
Kazu em jeral kazu foun hamutuk 14, iha Dili nain 12 no iha Fatumea Covalima nain 2, kazu rekuperadu zero no kazu ativu total 65.