Home Feature Siklone Seroja: Andre Lakon Buat Hotu, Salva Deit Família, Hein Governo Seidauk...

Siklone Seroja: Andre Lakon Buat Hotu, Salva Deit Família, Hein Governo Seidauk Mai

248
0
Andre Goncalves hamrik iha nia uma mak hetan sobu hosi dezastre natural 4 Abril (Foto: Adro S)

By Adroaldo Saretukau

Loron 4 Abril loron ida ne’ebé lori tristeza boot ba populasaun Timor li-liu ba komunidade sira ne’ebé afetadu hosi siklone tropical seroja. Akontesimentu ne’e halakon populasaun barak nia uma, riku-soin, animal, to’os, no ema be sira hadomi. Dezastre ida ne’e hamosu triste hodi hamonu mata wen tan mosu buat oi-oin, halo komunidade barak sai vulneral, inklui populasaun sira iha Postu administrative Laclubar, Munisípiu Manatuto.

Neon Metin buka tuir komunidade sira mak afetadu hosi siklone seroja ne’e. Iha fatin akontesimentu ho neon nakraik hateke ba uma sira naksobu, rai taka hodi obriga uma na’in buka fatin mahon ruma hodi helik netik aan ba.

Ba besik liu tan Neon Metin haree mane isin metan ida hamutuk ho nia oan hateke hela mai ami ne’ebé observa, ho kuriozu liu tan Neon Metin husu mane ne’e. Nia mak Andre Gonçalves hosi aldeia Balulin, Suku Batara, Postu administrative Laclubar. Ba Neon Metin nia konfesa dezastre mak akontese estraga nia uma no sasan uma laran sira hotu.

“Dezastre mak akontese iha domingu ne’e, hosi dader to’o loraik ha’u metin hela ho ha’u nia banin sira iha uma. Bee mai estraga uma, dapur, uma laran bee sobu hotu, sasan hotu, asu, roupa, sasan uma laran, foos, batar”, tenik Andre ho laran triste.

Nia hututan hafoin dezastre ne’e sira la hela ona iha sira nia uma maibé ba hela fali ho sira nia família tanba uma estraga hotu. Andre la konsege salva nia sasan sira.

“Akontesimentu ne’e iha dadersan tuku tolu. Iha tuku rua ho balu ha’u leno iha uma tatis, ha’u haree bee ne’e oin seluk, ha’u tama fali uma laran fanun ha’u nia tiu boot ami na’in rua koko salva maibe la biban tanba bee boot, anin mos maka’as, ai mos atu tohar, hau bolu ha’u nia banin ne’e ami muda tiha”.

Ho mes-mesak, Andre la importa ona ho nia sasan eh uma ne’ebé hetan da-daun estragus hosi bee ne’ebé sobu nia uma, naran katak salva netik nia família. Maske difisil maibé nia konsege salva sira hosi perigu ne’e.

“Konsege salva ha’u nia tiu na’in rua no banin na’in rua, ha’u nia ferik oan, ha’u nia oan na’in haat ho ha’u nia alin. Sira na’in hirak ne’e ha’u salva lori ba hotu iha sorin (família sira) sasan ho uma hau la salva ona, ha’u dehan penting ita moris”, Andre konta tuir ho laran dodook.

“Sasan ha’u la salva, tanba salva ona ha’u nia ferik oan ho ha’u nia oan, ami nia tiu ne’ebé matan aat, no sira ne’ebé fraku mak ami dada sai tanba agora bee boot. Ne’ebe sasan ami la salva, ami salva mak ami nia isin lolon de’it ho ami nia oan no ferik oan”, Andre hatutan.

Maibe susar la to’o deit ba saida mak akontese ba Andre nia uma tan nia mos  lakon plantasaun no animal hakiak. Kafé, tanjarina, bibi bee lori hotu. Uma to’os mos bee lori hotu. Da-daun ne’e sira labele ba ona sira nia to’os tanba to’os nakfilak tiha ba rai henek hodi halakon mos sira nia talas, ai-farin, hudi inklui tua, ne’ebé tahan sira hosi hamlaha ba tempu naruk nian.  

“Ami nia moris ho tua no kafe. Dezastre hanesan ne’e to’os ami la ba, animal ne’ebé ami kesi iha ne’ebá mos be lori hotu”.

Ho hanoin ne’ebé dook Andre imajina bainhira mak bele hadiak fali uma hodi hamahan netik nia fen ho oan na’in haat inklui nia família, tan oras ne’e uma a hetan estragus hotu. Ta’uk mos oras ne’e sira nia hela fatin iha risku nia laran ba mota no mos rai monu. Tanba ne’e sira sei muda ba fatin foun ne’ebé seguru liu.

Andre ho nia familia hein hela bainhira mak governo bele tun direita hodi haree ba dezastre ne’ebé afeta sira, nia husu mos apoiu ba sira.

“Se karik na’i ulun sira tau matan, bele ajuda netik kalen tahan ida ka rua mai ami para ami muda ses fali ba fatin seluk,” Andre koalia hela kona ba nia esperansa ida ne’e.

Iha parte sorin Xefe Suku Batara Tomas Pinto, haktuir udan boot ne’ebé akontese estraga maioria komunidade iha Suku refere nia uma, plantasaun no animal sira.

“Iha suku Batara hahú iha dia 3 no 4, iha kalan boot tama ba tuku 2 ho balu, mota tuun sobu komunidade sira nia uma no ai-horis. Sira ne’ebé afeta liu ba uma ne’ebé mak rahun hamutuk uma kain 82. Sira ida ne’ebé afeta naton no ba ai-horis ho animal ita konta total mak uma kain 590”.

Nia hatutan dezastre ne’e estraga li-liu komunidade sira nia animal hanesan karau, bibi, kuda, manu, fahi. Estraga mos dapur, haris fatin ho sasan seluk. Nune’e mos estrada iha aldeia haat ne’ebé sirkula iha suku Batara no bee matan sira hetan estragus hotu.

Soiklone ne’e estraga komunidade barak nia uma, sasan, animal, ai-horis no seluk tan. Oinsá governu rezolve emrjénsia ba problema sira be nia populasaun sira enfrenta? Tan ema ne’ebé vulnerável, sai vulnerável liu tan iha momentu ne’e.

Saida mak akontese ba Andre akontes mos ba membru komunidade afetadu sira seluk. Maibe laos sira hotu iha nesesidade hanesan. Andre lakon ona nia hela fatin, lakon mos nia kbiit ekonomia tan nia toos no animal sira ne’ebe nia laran metin ba hodi fo han uma laran la iha hotu. Andre sei hahu nia moris ho todan tebes.

Print Friendly, PDF & Email

LEAVE A REPLY

Please enter your comment!
Please enter your name here