Reportazen David da Costa Gusmao*
Movimentu Universitariu Timor-Leste (MUTL), husu ba governu liu-liu ba Ministro Edukasaun Juventude no Desportu (MEJD) no Ensinu Superior Siensia no Kultura (ESSK) atu reativa hikas fali aula normal.
Porta Voz MUTL Mauraco Coli hatete MUTL akompaña iha terenu nota katak, estudante hosi Ensinu Primaria to’o mai Ensinu Superior barak mak sai vitima ba iha serka sanitaria no konfinamentu obrigatoriu, iha loron 8 Marsu no mos halo estudante barak mak hetan difikuldade ba nesesidade baziku.
Nune’e MUTL rejeita total sistema aula online, tanba laiha formasaun husi eskola konaba aplikasaun, no estudante barak mak sei la asesu ba aula online no rede internet ne’ebe la estavel
“Ne’e duni ami husu ba MEJD no ESSK atu reativa aula normal fali, maibe nafatin tuir protokolu husi Organisasaun Mundial Saude (OMS) nian,” dehan porta voz Coli, liu husi konferensia imprensa iha UNTL Liceu, 28/04.
Nune’e MUTL husu ba Konsellu Ministru atu foti dezisaun, hodi loke hikas dalan publiku hosi Dili ba Munsipiu sira, atu estudante sira bele ba foti hahan no osan, hodi uza ba sira nia nesesidade basika no responde ba sira nia estuda.
“Se ezijensia ne’ebe mak ami hato’o mak governu la aseita, MUTL sei eziji ba governu atu pausa total atividade aula online, hodi fasilita estudante sira fila ba ida-idak nian munisipiu, no banhira mak aula loke fali hanesan babibain mak ami estudante sira mai fali hodi halao ami nia estudu,” nia akresenta.
*(David da Costa Gusmao nudar estudante UNTL ne’ebe halo estajiu iha Neon Metin)