Home Feature Inundasaun Estraga Uma, Domingos: Hakarak Buka Osan Hadia Uma Maibe Susar

Inundasaun Estraga Uma, Domingos: Hakarak Buka Osan Hadia Uma Maibe Susar

446
0
Komunidade afetadu Domingos Soares iha Paiol. [Foto: Joselina | 24.05.2021]

Reportajen Joselin dos Santos, Joanin Casemiro

Dezastre Natural akontese iha loron 4 Abril, hamosu udan bo’ot no inundasaun, konsege halakon ema nia vida, halo populasaun barak tauk no trauma to’o ohin loron.

Neon Metin buka tuir komunidade afetadu sira iha aldea Paiol, suku Lahane Ocidental Postu-Administrativu Vera-Cruz, Munisipiu Dili hodi hatene besik liutan situasaun komunidade afetadu sira ne’ebe to’o ohin loron sedauk hetan solusaun, hodi responde sira nia problema.

Jornalista Neon Metin lao kuaze ho distansia kilometru 5 ho balun, hodi hasoru komunidade sira ne’ebe afeta makaas hosi inundasaun. Iha fatin refere Neon Metin dadalia ho Domingos Soares, ne’ebe hasoru risku boot bainhira kontese udan boot no inundasaun.

Iha tempu ne’eba nia haktuir derepenti rona udan boot, rai tarutu no bainhira nia halai ba liur rai monu no taka dadaun sira nia uma leten, no nia hakilar hodi bolu sai nia fen, halai hodi salva-an

“Ha’u senti triste tebes no mata wen monu, tanba momentu ami halai sai ne’e ami nunka salva sasan uma laran, ami so lori mak kopu no sanan de’it laiha tan buat seluk. Haree ba kondisaun uma ne’e, ha’u labele halo bu’at ida tenki simu realidade,” dehan Domingos Soares ba Neon Metin iha Lahaene Ocidental 21/05.

Domingos dehan akontesementu iha loron 4 Abril ne’e hanesan buat foun ba nia familia,  tanba tinan -tinan udan, maibe nunka akontese hanesa ne’e. Udan boot Halo rai monu no taka sira nia kuartu rua no sala vizita inklui sasan uma laran la aproveita.

Depois de akontesementu Domingos ho nia familia muda ba sira nia papa nia uma. Iha uma refere iha uma kain nain nee mak hela hamutuk, sei fo susar liutan ba uma laran tanba nesesidade aumenta boot.

“Ha’u hakarak buka osan hodi hadi’a fila fali uma, atu nune’e ha’u lori fali fen ho oan ba uma maibe susar, tanba iha Serka Sanitaria no Konfinamentu Obrigatoriu ha’u labele halo bu’at ida, tanba ne’e governu nia regulamentu. Pasiensia loron-loron tur iha uma mak hateke malu de’it, ita hakarak buka osan maibe lolo liman lato’o,” nia dehan.

Domingos ho nia kaben tenta atu buka osan liu husi meius fa’an modo, no modo ne’ebe sira faan sosa tutan fali, maibe depende ba sorte tanba dalaruma ema la hola.

“Ami husu ba governu, se bele  kria kondisaun ruma ami prontu atu ba hela fatin ne’ebe mak governu aloka, tanba iha situasaun hanesan ne’e ami buka meius atu augenta moris de’it, maibe ami atu halo fali uma ne’e susar tanba osan iha ne’ebe, tanba atu ba fulan rua ona ami hela hamutuk ho pae sira, bainhira los mak situasaun ne’e normal fali atu ami bele buka osan hanesan bain bain”, tenik Domingos nakonu ho esperansa, karik nia bele nia hadia fali nia uma.

Iha Fatin hanesan Xefe Aldeia Jony Elvis hateten inundasaun ne’ebe mak akontese iha loron 4 Abril, iha aldeia Paiol uma kain hamtuk 34 mak hetan estragus,uma kain ne’ebe grave liu hamutuk 9 no uma kain ne’ebe aat liu mak uma kain rua ne’ebe labele duni para atu hela.

Nune’e karik liu husi media tulun, bele hakbesik-an ba komunidade afetadu sira,  bele ba to’o iha nai ulun sira karik, “ha’u husu tau matan uluk liu ba komunidade afetadu sira ne’ebe mak fatin la aproveita atu hela. Labele taka matan ba komunidade sira, se bele hadi’a uluk sira nia fatin, atu nune’e sira bele ba hela fali”.

“Durante ne’e, ha’u hamutuk ho Xefe Suku hato’o ona dadus kona-ba komunidade afetadu sira iha Postu-Administrativu Vera-Cruz, iha ne’eba Administrador avizu dehan ba komunidade sira mantein nafatin sira nia fatin, depois to’o tempu estadu sei kria fatin ba sira,” tenik Xefe Aldeia.

Hanesan autoridade lokal ejize nafatin ba estadu no governu atu tau matan ba ba komunidade afetadu sira, liu-liu ba ha’u nia komunidade uma kain rua ne’ebe mak fatin ladiak atu hela ba, governu bele haree no hadi’a fatin ruma ba sira, atu nune’e sira bele hela hakmatek.

Print Friendly, PDF & Email

LEAVE A REPLY

Please enter your comment!
Please enter your name here