Home Feature Tinan 1 Ona Hela Iha Centru Evakuasaun, Afeta Hosi Inundasaun Tinan Kotuk

Tinan 1 Ona Hela Iha Centru Evakuasaun, Afeta Hosi Inundasaun Tinan Kotuk

471
0
komunidade afetadu Josefa da Costa. [Foto: Marcio Morato | 25.05.2021]

Reportajen Marcio Morato Pinto

“Tinan ida ona ami hela iha Centru Evakuasaun Bairo Alto Lahane, desde loron 6 Marsu tinan kotuk to’o agora ami nafatin hela iha fatin ida ne’e tamba, hahu hosi inundasaun tinan kotuk ne’e, ami nia sasan sira iha uma laran hetan estragus no ami nia uma nakfera”. Josefa da Costa

Dezastre Natural ne’ebe akontese iha Timor-Leste konsege rezulta ema barak hetan afeta, balun lakon vida, sasan no uma. Iha loron 6 Marsu 2020 no 4 Abril 2021 inundasaun akontese iha Dili no municipio balun ne’ebe hetan risku boot, halo ema barak tenke evakua sai hosi sira nia uma.

Jornalista Neon Metin hasoru malu feto maluk afetadu hosi inundasaun ne’ebe akontese iha tinan 2020, halo nia tenke muda sai hosi nia uma no to’o ohin loron sei hela nafatin hela iha centru evakuasaun Alto Lahane.

Impaktu hosi Siklone Seroja ne’ebe hamosu udan, anin no inundasaun boot iha 4 Abril 2021, rezulta ema barak tenke evakua sira nia-an. Governu, sosiadade sivil no grupu solidariedade sira fo liman ba malu, hodi responde nesesidade emerjensia.

Ema hotu tau importansia liu ba inundasaun ne’ebe akontese iha tinan ida ne’e, maibe haluha tiha katak inundasaun ne’ebe akontese iha tinan kotuk, halo familia balu seidauk bele fila ba sira nia hela fatin to’o ohin loron, ida ne’e mak akontese ba feto maluk Josefa da Costa.

“Tinan ida ona ami hela iha centru evakuasaun Bairo Alto Lahane, desde loron 6 Marsu 2020 to’o agora.  Ami nafatin hela iha fatin ida ne’e tamba hahu hosi idundasaun tinan kotuk ami nia sasan sira iha uma laran hetan estragos hotu, no rai sira iha leten monu tun taka tomak tiha janela no halo uma nakfera,” dehan Josefa ba Neon Metin, iha Bairo Alto Lahane 23/05

Ba Neon Metin Josefa konfesa katak sasan ne’ebe hetan estragus iha tinan kotuk, kuaze fulan tolu nia laran, sira hakas an hasai hodi fase fila fali hanesan roupa, kulsaun, lensol, no sira husu tulun ba familia sira atu ajuda hasai rai ne’ebe monu tama iha uma laran no fase uma laran, maibe sira nafatin labele hela iha ne’eba, tamba fatin ne’ebe sira hela fó risku ba sira.

“Momentu ne’e ami fó pedidu ka proposta atu husu tulun maibe to’o agora tinan ida ona la iha rezultadu. Xefe Aldeia ba hare ami nia uma no nia dehan katak ami labele hela iha ne’eba, tamba bele fó risku tebes mai ami. Uma laran no kuarto laran sira ne’e nakfera hotu, no fio eletrisidade halai tun mai hotu uma, ami ba fó hatene ona PLN/EDTL maibe to’o agora sira seidauk foti sai fio sira ne’ebe iha”, haktuir Josefa.

Oras ne’e dadaun familia ida ne’e, sei nafatin hela iha centru evakuasaun, tamba uma ne’ebe sira hela hetan estragus hotu, to’o agora seidauk hetan tulun ba materiais konstrusan nian hosi parte governu nian.

 Inan ne’ebe iha oan nain haat koalia ba Neon Metin ho matan ben nakonu, maske iha situasaun ne’ebe hasoru susar,  nafatin agradese tanba sira sei bele hamahan an iha mahon ida, hodi satan an hosi risku ne’ebe iha.

 “Ami sente seguru hela iha fatin evakuasaun, tanba ami sente hakmatek, ami nia oan sira bele halimar ho diak, maske ami tau kulsaun iha rai no nahe biti iha semente durante tinan ida tomak”, dehan Josefa.

Josefa saudades los ona nia uma, hakarak los atu fila ba nia knua, matan wen komesa turu ba nia hasan, hatudu duni nia saudades ba nia uma tanba tinan ida liu, ses-an hosi uma ne’ebe sira hela ba.

Maske nia ho nian kaben hikis kosar hodi serbisu hodi faan hahan (gorengan) maibe ida ne’e la to’o hodi rai hamutuk, atu hadia uma fali uma, tanba folin ne’ebe karun.

“Ami nia fatin iha, maibe tanba situasaun COVID ida ne’e halo ami labele lao tun sae, no susar atu ami hetan osan”, dehan Josefa.

Ho lian nakdedar nakonu ho matan ben, inan Josefa haktuir katak labele obriga governu, tamba ema barak terus liu, laos ida rua deit, governu tau matan ba ema barak no susar atu kontrola povo sira seluk ne’ebe moris terus no aat liu sira.

“Karik Nain ulun sira hanoin ami, sira bele tau netik fatin ruma, ka fó netik tulun materiais ruma mai ami, hodi nune’e ami bele hadiak fali ami nia uma ne’ebe hetan estragus hosi inundasaun iha tinan kotuk no tinan ida ne’e, taka balun, naran katak udan labele kona ami no loron matan labele habai ami,” dehan Josefa ho esperansa boot bele fila fali ba nia uma iha tempu ida.

Karik sei iha Josefa sira seluk ne’ebe presija duni tulun hosi estadu, atu sira sai hosi mukit. Estadu iha dever boot hodi tau matan ba nia povu hotu, no la husik ida moris iha kotuk, maibe bainhira mak Josefa ho Josefa sira seluk, bele hetan direitu nudar sidadaun ida atu moris ho dignu.

Print Friendly, PDF & Email

LEAVE A REPLY

Please enter your comment!
Please enter your name here