Reportajen Adroaldo ‘Saretukau’
Rotaract Club of Manatuto (RCM) hetan fundus osan $500 hosi Rotary Dili of Lafaek (RDL), hodi sosa nesesidade bázika hodi fahe ba família kbiit laek na’in 30 no ema ho defisiénsia na’in 8 iha Postu Administrativu Laclubar, Munisípiu Manatuto.
Família afetadu hosi dezastre naturais ne’ebé akontese iha 4 Abríl liu ba, Aida Belo hosi Aldeia Torilalan, Suku Orlalan, Postu Laclubar, ne’ebé Neon Metin Publika nia istória iha 20 Maiu liu ba, RCM kontaktu Neon Metin liu hosi Facebook, hodi husu situasaun família afetadu nian, foti dadus familia ne’e hodi simu apoiu hirak ne’e.
Liu fulan ida Aida ho nia família hela iha lona okos, tanba afeta hosi inundasaun boot iha fulan Abril, maibé agora daudauk sira muda no hela hamutuk ho família sira seluk.
Wainhira grupu RCM to’o iha nia fatin hodi distribui nesesidade bázika ba Aida ho nia família, nia sente kontente tebes ho prezensa grupu refere, tanba bele hanoin netik terus ne’ebé sira hasoru.
“Ha’u kontente tebes ho ita nia prezensa, sasan barak ka oi-tuan mos ami simu, tanba hanesan ita boot sira nia servisu, ita haree hanesan ne’e ita boot sira la taka matan”, hateten família kbiit laek Aida 12/06.
Ba distribuisaun ne’e, Prezidente Interinu Rotaract Club of Manatuto, Filipio Soares hateten objetivu hosi sira nia prezensa ne’e mak atu fahe netik nessidade bázika ba família kbiit laek, ne’ebé sira identifka ho total 38.
“Objetivu prinsinsipal hosi distribuisaun nesesdade bázika ba família sira mak atu hakbiit netik família kbiit laek sira no família difisiente sira iha situasaun difisil ida ne’e nia laran. Benefisiáriu ba distribuisaun nesesidade bázika iha Postu Administrativu Laclubar hamutuk ema na’in 38, família kbiit laek hamutuk 30 no difisiente na’in ualu”, hateten Prezidente Interinu Rotaract Club of Manatuto, Filipio, 12/06.
