Home Notisia FRETILIN – PLP Loke Dalan Ba Harii IX Governu Konstitusional

FRETILIN – PLP Loke Dalan Ba Harii IX Governu Konstitusional

5307
0
Sekretaru Jeral FRETILIN ho Prezidente PLP asina deklarasaun hodi harii IX Governu Konstituisional. [Foto: Edio Guterres | 21.03.2020]

Reportazen Zevonia Vieira

Frente Revolusionaria do Timor-Leste Independente [FRETILIN] ho Partidu Libertasaun Popular [PLP], iha loron 21 Marsu 2020 hala’o deklarasaun konjunta atu hamrik hamutuk hodi loke dalan ba formasaun IX Governu Konstitusional no kontribui ba lori Timor-Leste sai husi impase polítika ne’ebé rai ne’e hasoru daudaun.

Liu husi deklarasaun konjunta ida, Sekretariu Jeral FRETILIN, Dr. Mari Alkatiri no Prezidente PLP, Sr. Taur Matan Ruak, hato’o ba públiku katak sira nia hamutuk ida ne’e “atu haburas valores no prinsipius luta libertasaun nasional nian, atu hametin demokrasia no habelar justisa ba povu tomak.”

Nune’e mós sira hakarak “atu hadiak sistema governasaun no harii kultura institusional no vida institusional Estadu nian, vida no kultura ida ne’ebé hotu-hotu tenki respeita Konstituisaun, Lei no Autoridade Estadu de Direitu Demokrátiku nian” iha Timor-Leste.

Ho intensaun atu atinji objetivu importante hirak ne’e mak lideransa husi FRETILIN ho PLP ne’e deklara katak sira “atu hamutuk loke dalan ba harii IX Governu Konstitusional iha tempu badak.”

Maske deklara katak sira mak sei harii IX Governu Konstitusional iha tempu badak, FRETILIN ho PLP mós deklara katak sira “loke dalan deit, no tamba kaer metin hanoin atu hametin UNIDADE NASIONAL, mantein odamatan nakloke ba simu iha prosesu Governasaun Nasional, apoiu tomak ne’ebé bele mai husi sidadaun hotu-hotu, la hare ba sexu, idade, relijiaun, rasa, kór polítiku ka orientasaun moris nian.”

Dr Mari Alkatiri, deklara mos katak tamba agora dadaun ita hasoru situasaun emerjensia no pandemia COVID-19, hanoin katak laiha dalan atu ba Eleisaun Antesipada ka formasaun imediata ba IX Governu. Dr Mari Alkatiri hatutan mos katak nia hanoin VIII Governu tenki mantem, maibe tenki iha remodelasaun.

Dr. Mari Alkatiri ho Prezidente PLP, Taur Matan Ruak konvida ema Timor oan hotu-hotu atu ba hamutuk harii Nasaun, haburas demokrasia, pronto atu defende soberania no fo an tomak ba hametin Estadu de Direitu Demokrátiku iha Timor-Leste.

Tuir deklarasaun hosi Sekretariu Jeral FRETILIN katak iha semana oin sei aprezenta proposta ba Prezidente da Republika hod hare.

LEAVE A REPLY

Please enter your comment!
Please enter your name here