Reportazen Francisco JDA
Prezidente Autoridade Nasionál Komunikasaun (ANC), Joao Oliveira informa daudaun ne’e Munisípiu Ermera, Baucau, Dili, Liquisa maioria serbisu liña internet 4G ne’e disponivel asesu, maski foun iha tore rua ka tolu maibé serbisu 4G ne’e asesu iha ne’ebá, maski ida ne’e la sura ho Postu administrativu sira.
Nia dehan molok ANC hamriik governu emite ona registrasaun ba iha operadores serbisu movel tolu hanesan Timor Telecom, Telemor no Telcomcel, ses hosi operdor tolu ne’e ANC emite mós registrasaun ba Internet Services Provider (ISP) no sertidaun ne’e fo ona ba empreza 5, hanesan Gardamor, Metrolink, Globalnet, Stacontel ho Raphfision agora ne’e sira iha ona kapasidade halo operasaun hanesan fornesedor internet.
“Prosesu registrasaun sei la’o nafatin, ita espera ba futuru ne’e bele aumenta númeru, husi númeru ne’e ita bele hamosu kompetisaun makaas no husi kompetisaun ne’e bele hahú responde ba pontu balun mak presu, operadores ne’e aumenta makaas automátikamente bele halo buat rua, atu mantein nia konsumidór ninia kualidade tenke di’ak no presu tenke baratu, espera serbisu sira hanesan ne’e ita dudu nafatin atu kontribui ba saida mak ita nia populasaun halerik,” hateten Presidente ANC, Joao Oliveira hafoin sai orador ba seminariu kona ba internet Freedom iha salaun FONGTIL, 12/07
Presidente ANC esplika tan, setór ida ne’e la’ós ema hotu mak koñese no komprende didi’ak, entaun presiza atividade literasia ne’e lao makaas nafatin, atu ema bele komprende didi’ak se lae bele hamosu konfuzaun, no ema balun aproveita hodi dudu sira nia interese.