Reportajen David da Costa Gusmao
Arbitrajen 21 husi Asosiasaun Futeból Manufahi (AFM) simu formasaun nivel D husi Federasaun Futeból Timor Leste (FFTL), hodi halo preparasaun ba jogu komunitáriu ne’ebe sei realiza iha loron 28 Agostu tinan ne’e.
Ba jornalista estrutura Arbitrajen, Aniceto Borlelo hateten programa formasaun ida nee halo husi federasaun, liu husi diresaun arbitrajen hodi fo kapasitasaun ba joven sira, atu halo selesaun ba arbitu sira, hodi prepara jogu ne’ebe mak AFM sei realiza iha 28 Agostu tinan nee
Nia dehan total arbitrajen ne’ebé tuir formasaun iha nivel D hamutuk 21, feto 2 no mane 19 maibe husi 21 ida ne’e sei halo selesaun hodi define sei mak atu pasa formasaun refere.
Tanba ida ne’e mak Asosiasaun Futeból Manufahi sente katak jogu ne’e presiza duni arbitrajen, FFTL halo kedas planu ida hodi mai fó programa arbitu refrei nian durante semana ida.
“Arbitrajen husi 21 ne’e laos foun, maibe arbitrazen balun iha ona nivel D kontinua nafatin ho nivel D, sira foun presiza duni sertifikadu nivel D, atu legaliza iha federasaun no mós asosiasaun hodi bele realiza jogu,” tenik nia.
Sorin seluk formador arbitrajen Dolia Tereza hateten durante formasaun semana ida nia laran sente kontente no agradese tanba hetan oportunidade hodi aprende buat barak ona kona ba arbitu nian husi formador sira.
“Hanesan feto ne’ebe mak gosta duni desportu, hare ba durante ne’e kuaze mane deit, maibe ami sente orgullu tanba laos mane de’it mak bele, mais feto mos bele involve iha parte arbitu nian,” nia espresa.