Reportajen Francisco JDA
Loron 20 Agostu 1975, tama iha istória luta libertasaun nasionál, nu’udár loron FALINTIL– Forsas Armadas Libertasaun Nacional Timor-Leste.
Liuhusi diskursu Prezidente Parlamentu Nasional (PPN), Aniceto Guterres hateten FALINTIL mosu iha senáriu polítiku espesiál ida, tanba hari’i ho orientasaun husi Komité Sentrál FRETILIN, hafoin deklarasaun insurreisaun Jerál Armada iha Aisirimou, Aileu, iha 15 Agostu 1975. Militár timoroan sira ne’ebé halo parte ezérsitu portugés, iha Kuartél-Jerál Taibessi, organiza-an nu’udár brasu armadu FRETILIN, ho objetivu atu restaura pás no estabilidade
“Tinan 24 uza estratéjia oin-oin hodi kontinua funu ho lema “MATE KA MORIS UKUN RASIK AN”. Povu identifika-an ho FALINTIL, tanbá FALINTIL hamriik ho povu nia oan sira. Tanbá forsa rua ne’e inspira no apoia malu, Rezisténsia metin ba bebeik, tinan ba tinan, ho partisipasaun Timor-oan sira iha diáspora, no apoiu husi komunidade internasionál lori Timor-Leste to’o hetan Ukun rasik an” hatete Presidente Parlamentu Nasionál iha Kuartél Jeral Fatuhada, 20/08
Nia dehan ko’alia konaba FALINTIL nia susesu, ita labele haluha sira ne’ebe kontribui ba Frente Armada, nu’udar estafeta liu-husi kna’ar klandestinu sira seluk, tanbá sira mós dedika-an ho sakrifísiu oioin no tau sira-nia an iha risku boot.
Aniceto mos dehan iha loron ohin ita tenke temi mós ita-nia buibere sira nia apoiu konsistente ba FALINTIL. La’ós Buibere barak mak kaer kilat, maibé sira nia apoiu inkondisionál ajuda tebes FALINTIL kontinua funu. Barak tebes mak arriska sira-nia vida no família nian iha vila okupada sira, tambá uza sira-nia hela fatin rasik, nu’udar sentru apoiu lojístiku ba FALINTIL. Kompatriota feto barak sai ponte ligasaun entre Frente Armada, Frente Klandestina no Frente Esterna. Sr. Prezidente Repúblika husu ita hotu atu rekoñese no koñese liu tan obra koletiva ida ne’e, ne’ebé hanaran “Buibere Hamriik Ukun Rasik An”. Hatete PPN Aniceto Guterres
PPN Aniceto Guterres husu ba Ministériu relevante sira no parseiru sira atu tulun Konsello Kombatente Libertasaun Nasionál (CCLN) no Centro CHEGA, hodi dezenvolve fatin sira ne’e, no inklui iha roteiru turizmu eko-istóriku no seluk-seluk tan, nune’e, dada turista sira husi rai sira seluk, liu-liu husi país viziñu sira, hodi hatama reseitas ba Estadu.
