Reportajen David da Costa Gusmo
Komunidade uma kain hamutuk 280 iha suku Haekoni, Postu administrativu Baguia, Munisipiu Baucau seidauk asesu eletrisidade.
Autoridade Lokál Suku Haekoni, Luis De Oliveira ba Neon Metin informa, suku Haekoni ne’e iha aledia neen (6) hanesan Aldeia Basarauai, Afalari, Uaiboru, Batata, Larisula no Larigua, ho total populasaun hamutuk ema nain 2,662 no uma kain hamutuk 557, hosi total uma kain ne’e, uma kain 280 mak la asesu eletrisidade no uma kain 277 asesu ona eletrisidade.
“Iha hau nia suku ne’e iha aldeia neen, mas iha aldeia tolu hanesan Afalari, Larisula no Larigua ho uma kain hamutuk 280 mak seidauk asesu ba liña eletrisidade, mas hau nia aldeia tolu Basarauai, Uaiboru, no Batata ho total uma kain 277 ne’e asesu ona ba eletrisidade,” dehan Autoridade Lokál ba Neon Metin, bainhira partisipa iha Retiru Nasionál iha Uaibitai Matebian, Sábadu 21/08.
Nia dehan total uma kain sira ne’ebé seidauk asesu ba eletrisidade durante ukun-an to’o mai agora, parte autoridade lokál halo ona proposta ba Prezidente Eletrisidade Timor-Leste Empreza Publika, no hato’o ona ba governu maibé seidauk iha resposta.
“Hakarak husu ba governu no parte relevante sira, atu aselera lalais ami nia komunidade sira nia preokupasaun, tanba eletrisidade ne’e importante ba ami nia komunidade sira,” dehan Xefe Suku Luis.
Hatan ba iha preokupasaun ne’e prezidente EDTL.ep, Paul da Silva hateten programa ba setór eletrisidade, liu liu preokupasaun sira ne’ebé ohin hato’o mai iha parte governu,” los duni ita iha prioridade lubuk ida ita halo, oinsá mak kontinua programa iha dedikasaun nasional para ita nia komunidade sira bele asesu eletrisidade, daudaun ne’e ita lansa ona projetu hamutuk 34 pakote, ita halo tenderizasaun, no restu ita hahu preparasaun dezeñu no BQ, buat hotu posivel iha Setembru nia laran, ita sei lansa tan restu 40 resin suku ba tenderizasaun.
Nia konklui katak ba munisipiu Baucau projetu ne’ebé mak lansa ona iha tenderizasaun, mak suku Osala 1 postu Vemasse nian, Suku Maluro postu Quelicai, iha fulan Setembru nia laran sei lansa tan, iha Suku Namanei postu Quelicai, inklui mos suku Haekoni nian, ho nia aldeia tolu hanesan Aldeia Afalari, Larisula no Larigua, no mos Sagadate postu Laga nian no Osoala 2 nian.