Reportajen David da Costa Gusmao
Autoridade lokál Suku Haekoni, Luis de Oliveira hateten fatin turizmu iha foho Matebian ne’e kuaze iha 20 resin, hanesan fatin turizmu kulturál, istóriku no relijiozu, tanba ne’e mak Ministériu Turizmu no Komérsiu Indústria (MTCI) tenke tau atensaun ba iha fatin turizmu sira iha foho Matebian.
“Dala barak ha’u ko’alia ema ne’ebé mai haree ne’e, sira mai haree deit, maibe seidauk tau sinal ida, no laiha implementasaun iha fatin turizmu istóriku, kulturál no relijiozu. Ho ida ne’e mak hau presiza husu ba iha MTCI atu haree no presiza tau sinál sira katak ida ba iha fatin turizmu, ne’e katak fatin turizmu ida ne’e maka istóriku, kulturál no relijiozu,” dehan Xefe Suku Haekoni, bainhira halo nia intervensaun, iha Retiru Nasionál iha Waibita, Matebian, Sabado 21/08.
Hatan ba preokupasaun ne’e, Ministru Turizmu Komérsiu Indústria (MTCI), José Lucas do Carmo da Silva hateten setór turizmu hetan papél importante iha VIII Governu Konstitusionál, konsidera setór sai setór produtivu, ne’ebé tenke dezenvolve, tanba ne’e MTCI iha programa própriu ba ida ne’e.
“Desde agora ita iha períodu Covid-19 ne’e, ita fokus ba turista rai laran, dezenvolve turizmu rai laran, mak ita hamosu turizmu komunitária ka turizmu baze hosi komunidade, tanba ne’e iha ona programa iha territóriu laran lao ona. Espesifikamente ba Quelicai ho Baguia ne’e pakote ida naran dalan ba rezisténsia”, nia esplika.
