Governador Asian Development Bank (ADB) Timor-Leste, Santina Jose Rodrigues Ferreira, nudar mos Ministra Finansas Timor-Leste hatama deklarasaun ba iha Enkontru Konsellu Governador nian ba Dala-58 hodi valoriza parseria ADB nian, apresia investementu no asistensia teknika mak durante ne’e ADB fornese ona ba Timor-Leste, ohin iha Milan, Italia.
“Timor-Leste valoriza duravel parseria ho ADB. Hosi kedas Timor-Leste nia independensia, ADB firmi fo apoio ba aspirasaun sir aba dezenvolvimentu nasaun nian liu hosi apoio finanseiru no asistensia teknika. Ami elojia ADB ba ninia Estratejia 2030 nian, ne’ebe alinha ho Timor-Leste nia prioridade dezenvolvimentu nasional sira iha Governo Konstitusional Da-9 nian,” hatete Deklarasaun Governador Timor-Leste nian, Santina Jose Rodrigues Ferreira.
“Ami apresia ADB nia asistensia teknika hodi suporta ami nia esforsu hodi tam aba ASEAN, liliu preparasaun ba integrasaun ekonomia nian,” Deklarasaun Governador ne’e hatutan.
Deklarasaun ne’e mos hatete katak suporta ADB nian instrumental tebes hodi fo avansu ba infraestrutura kritikal sira, liliu konektividade estrada, projetu be’e moos no saniamentu sira hosi parte norte no sul nian. Investementu sira ne’e liga komunidade sira, hadiak asesu ba servisus esensial sira, no establese fundasaun ba kresimentu ekonomia ida ne’ebe sustentavel.
Governador Timor-Leste mos rekoinese katak setor privadu mak vital tebes ba kriasaun empregu no kresimentu ekonomia. Kontinua hadiak klima investementu no promove entreprendedorizmu, ami mos hateke ba oin atu kontinua parseria ho ADB ho atrai liutan intestementu setor privadu nian ba setor turizmu, agrikultura, no enerjia renovavel.
Iha tempu hanesan Governador mos kongratula Presidente Masato Kanda. Kanda sai ona nudar Presidente ba dala-11 hosi ADB nian. Governador Timor-Leste iha konfiansa ba lideransa Presidente Kanda nian no hateke bao in hodi kontinua hametin parseria no lori progresu ba objetivu dezenvolvimentu sira.
Enkontru Konsellu Governador ADB nian ne’e partisipa hosi Governador membru ADB nain 51. Deklarasaun hato’o diretamente iha enkontru laran hamutuk Governador 41, no Governador nain 10 seluk hatam deit sira nia deklarasaun.
Delegasaun hosi Timor-Leste ne’ebe partisipa iha Enkontru Annual ADB nian ba Dala-50 nian mak Ministra Finansas no nudar mos Governador ADB Santina José Rodrigues Ferreira Viegas Cardoso, Alternativu Governador no Ministru Planeamentu no Investementu Estratejiku, Gastão Francisco de Sousa, Asesor Exekutivu Senior ba Ministra Finansas, Mr. Ramon Oliveiros, Asesor Ministeriu Planeamentu no Investementu Estratejiku, Julio Tomas Pinto, Diretora Nasional Unidade PPP, Sitalina M. Tilman, Xefe Gabinete Ministeriu Finansas, Brigida da Silva.
Jeralmente Enkontru Annual ADB ba Dala-58 ne’e partisipa hosi ema liu 5,000 inklui reprezentante hosi governo, setor privadu, sosiedade civil no academia. ADB mak banku dezenvolvimentu multilateral ne’ebe suporta inkluzividade, kresimentu sustenavel iha Asia no Pasifiku. ADB harii iha 1966 no nain ba membru 69 no membru nain 51 hosi rejiaun Asia no Pasifik.
