Reportajen David da Costa Gusmao
Autoridade lokál husi suku Laisorulai de Baixo, postu Administrativu Quelicai, Munisipiu Baucau Preokupa ho osan ne’ebé mak Ministériu Administrasaun Estatál (MAE) $12 mill ne’ebe aloka ba reabilitasaun ba sede suku sira.
Autoridade lokal Suku Laisorulai de Baixo, Julio Farkhus Pinto hateten, iha tinan 2021 MAE aloka orsamentu hamutuk $12 mill, agora edifísiu suku sira iha Timor-Leste laran ne’e nia largura la hanesan, uma sira ne’e balun konstrui iha tinan 2007 no balun uza de’it uma ne’ebe Indonesia sira hela ne’e. Hanesan sede suku Laisorulai de Baixo ne’e, Indonesia mak rai hela, ho nia largura ne’e 15 x12, agora osan ne’ebé aloka mai ne’e $ 12 mill de’it.
“Se kuandu ita atu halo reabilitasaun no book tembok sira ne’e dala ida, tembok sira ne’e bele monu hotu, entaun osan ne’e bele prejudika ba reabilitasaun ba sede suku. Ami sujere ba Ministériu Administrasaun Estatál atu bele tau konsiderasaun ba ami nia preokupasaun ne’e,” dehan Autoridade Lokal, Suku Laisorulai de Baixo, Bainhira partesipa iha Retiru Nasinal iha Waibitai Matebian, sabado 21/08
Hatan ba preokupasaun ne’e, Ministru Administrasaun Estatál (MAE), Miguel Pereira de Carvalho hateten tinan ida ne’e VIII Governu Konstitusionál atu hadia xede suku sira hotu ne’e pela primera vez. Iha tinan 2006 halo sede suku iha Timor laran tomak, ho osan $7mill, fahe ba suku hotu, balun hamrik hanesan daudauk, depois tinan barak nia laran uma sede suku sira ne’e mos kondisaun sira ladiak ona.
“VIII governu konstitusionál hanoin ida katak, depois tinan 14, sede suku sira ne’e presiza hadia, tan ne’e mak iha tinan ida ne’e, ita hahu hadia ona sede suku hamutuk 149 iha Timor laran tomak, iha Baucau mesak deit ita hadia sede suku 20, tinan oin bainhira Orsamentu Jeral Estadu naton, ita bele finansia tan reabilitasaun 257 para atu kompleta reabalitasaun sede suku iha Timor hotu”, nia esplika.
Nia dehan, halo reabilitasaun nia objetivu maka atu bele fasilita administrasaun suku, xefe suku no xefe aldeia sira, atu bele hala’o sira nia serbisu iha sira nia suku, hodi serbí populasaun sira, no mos hodi serbí pontu ligasaun entre governu lokál ho governu central.
“Tan ne’e mak relasaun ho kestaun ne’ebe mak ohin xefe suku Laisorualai De Baixo, hato’o konaba osan ne’ebe mak aloka ba ita boot sira nia suku hodi reabilita ne’e, osan ne’e la to’o, Prontu iha tinan ida ne’e aprosimasaun governu nian katak aloka osan hanesan ba suku hotu, para halo reabilita lai sede suku sira hotu iha Timor laran,” tenik nia.
Nia esplika, sede suku balun fo osan $12 mill, tinan ida ne’e ba kada suku,”hau husu ba ita boot sira, para ita boot sira halo ezersísiu mos, tanba kapasidade orsamentu governu nia mak ne’e ona, portantu tenke halo ezersísiu, total forma para utiliza osan ida ne’e hodi reabilita ita boot sira nia sede suku”.
“Hau hakarak hato’o katak MAE kompremetidu para atu fasilita nafatin atu administrasaun suku sira funsiona di;ak iha Timor laran tomak. Iha tinan ida ne’e ita halo reabilitasaun ba suku 27, hau espera ho OJE tinan oin, ita bele kompleta tan 49 Suku iha munisípiu Baucau,” nia promete.
