Home Analisa Direito de Resposta e de Retificação: Providénsia adekuadu ba defeza Direitu Personalidade

Direito de Resposta e de Retificação: Providénsia adekuadu ba defeza Direitu Personalidade

1206
0
Zenatu Zeneves. [Foto: Dok. privadu | 06.09.2021]

Hakerek nain Zenatu Zeneves

Iha ita nia direitu konstitusionál liberdade espresaun no imprensa hola parte iha Direito, Liberdade e garantia pessoais. Garantia konstitusionál ida-ne’e prevé iha Artigu 40.°  ne’ebé ko’alia kona-ba liberdade espresaun no Artigu 41.° kona-ba liberdade imprensa. Garantia hirak ne’e fundamentál tebes ba ezekusaun prinsípiu no valor sira estado de direito democrático nian. Previzaun konstitusionál ida-ne’e hanesan buat rua ne’ebé inseparável iha prinsípiu estadu modernu nian ne’ebé ita adopta. Tambá liberdade expresaun konsiste prerrogativa fundamentál ida-ne’ebé investe iha ser humano poder de autonomia ida ou hanesan poder ida-ne’bé nia determina konforme nia konxiénsia rasik. Poder ida-ne’e konsiste iha poder ba atuasaun hodi buka realizasaun nia a’an no nia felisidade rasik. Nune’e liberdade espresaun hanesan liberdade ema idaidak nian hodi espressa nia ideia lahó tauk tambá coerção ou represálias.

Iha sorin seluk, liberdade imprensa konstitui cerne ida ba sosiedade livre no demokrátiku nian. Tan-ne’e, liuhusi informasaun jornalístika independente no la iha sensura, povo bele avalia akontesimentu moris sosiál ou públika nian. Ho liberdade imprensa povo bele ezerse sira nia direito de ser informado no bele partisipa ho nia konxiénsia kona-ba vida sosiál ou realidade públiku. Tan-ne’e, iha ita nia Direitu Konstitusionál konsidera ida hanesan relasaun estreita entre Artigu 40.° no 41.° CRDTL. Purtantu, liberdade imprensa intimente ligadu ho liberdade espresaun tamba liuhusi direitu ida-ne’e mak hanoin no ideolojia sira bele manifesta no diskute ba formasaun pensamentu iha sosiedade.

Maske konstituissaun fó pleno gozo liberdade ida-ne’e maibé natureza umana ema nian, tentativa ba abuzu liberdade espresaun no imprensa bele akontese. Abuzu hirak ne’e bele kauza ofensa ba direitu fundamentál sira seluk hanesan: direitu personalidade (direito bom nome, imagem, reputasaun no seluk-tan) no bens jurídica supra-individuál ne’ebé koresponde ba intrese públiku. Doutrinariamente, atuasaun ba situasaun hirak ne’e mak limitasaun ba liberdade espresaun no imprensa iha komunikasaun sosiál. limitasaun ba liberdade espresaun no imprensa iha komunikasaun sosiál iha direitu komunikasaun sosial iha kada ordenamentu jurídika iha diferensia.

Iha ita nia ordenamentu jurídika protesaun no defesa ba bens jurídico, konstitusionalmente hetan protesaun hanesan haktuir iha artigo 36.° CRDTL. Maske nune’e, protesaun no defeza ba direito à honra e à privasidade ida ne’e iha diferensia ho ordenamento juridiku país sira CPLP nian. Diferensia ida-ne’e akontese mai kedas husi planu sira kona-ba responsabilidade kriminál no sivil. Iha país sira CPLP planu protesaun no defeza sira ba direito personalidade ou direito a honra e privacidade mai ho planu responsabilidade kriminál no sivil.

Iha kazu timor-Leste nian, desde inisiu relativa ho protesaun no defeza ba direitu personalidade mai ho planu responsabilidade civil iha kazu sira relativa ho komunikasaun sosiál la iha aplikasaun responsabilidade kriminál. Esperitu ida-ne’e mai husi espiritu luta ba ukun-rasik a’an kontra rejime ditadura Soeharto nian; ne’ebé hamate liberdade espresaun no imprensa. Ho espiritu ida-ne’e mak planu responsabilidade relativa ho kazu sira iha komunikasaun sosiál aplika responsabilida sivil no responsabilidade kontra-ordenasaun. Iha responsabilidade civil regula iha artigu 67.° CCTL no relativa ho kontra ordenasaun regula iha artigo 40.°. Lei N.° 5 /2014 de 19 de Novembro Lei da Comunicação Social.

Iha similidaridade entre ordenamento jurídico iha país sira CPLP nian iha kontestu komunikasaun sosiál mak kestaun direitu komunikasaun sosiál hanaran direito de resposta ou de retificação. Direito de resposta ou de retificação klasikamente dezignadu hanesan direitu resposta (hak jawab) tuir konstitusionalista Vital Moreira, Direito de Resposta “ é o poder, que assiste a todo aquele  que seja pessoalmente afectado por noticia, comentário ou referencia saída num órgão de comunicação social, de fazer publicar ou transmitir nesse mesmo órgão, gratuitamente, um texto seu contendo um desmentido, rectificação ou defesa”. Tamba-ne’e, nia konsidera direitu de resposta hanesan instrumentu defesa ema nian, kontra kualker opinaun ou imputasaun ho karáter pesoál ofensiva ou prejudisiál ou kontra kualker notisia ou referénsia pesoál inverídica ou inexacta. Definisaun ida-ne’e implisitamente kontein iha artigu 34.° Lei N.° 5 /2014 de 19 de Novembro, Lei da Comunicação Social.

Doutrinariamente, iha opinaun oioin relativa ho Direito de resposta ne’ebé konsidera hanesan instrumento defeza ba direitu personalidade, nomeadamente direitu ba bom nome no reputasaun. Iha hanoin balu hateten katak iha âmbitu direitu imprensa, direitu resposta konsidera nu’udar direitu ida individuál atu asesu meiu sira informasaun nian no partisipasaun iha formasaun opinaun públika. Iha mós hanoin katak direitu resposta hanesan instrumentu ida iha pluralizmu informativomaibe ida ne’e bele exerse deit husi ema sira ne’ebe hetan ofensa ba sira nia personalidade husi publikasaun husi orgaun komunikasaun sosial.

Sorin seluk, iha hanoin seluk katak direitu resposta konsidera hanesan garantia verasidade informativa, ne’ebé la’ós deit oferese hodi responde ba posibilidade atu aprezenta nia versaun kona-ba faktu sira, mas hanesan mós insetiva ba auto-kontrolu ba jornalista sira, ne’ebé justamente monu ba dezautorizasaun públika iha ninia orgaun komunikasaun sosiál. Iha mós hanoin katak direitu resposta hanesan sansaun ou indeminizasaun relativa ba publikasaun sira ne’ebé ofensa direitu personalidade.

Ho hanoin hirak ne’e, jeralmente doutrina destaka direitu resposta iha funsaun dupla; ida Proporsiona meiu ida hodi solusiona problema ho lais, simples no la dispendioso defeza ba reputasaun ou koresaun ba referénsia inverídica ou errônea. Iha kontestu ne’e, mezmu la impede títular de direito bele halo prosesu kontra orgaun ou meiu ne’ebé nia publikasaun ofensa ba nia direitu personalidade maibé tenke sivilmente la’ós kriminál. Tan-ne’e, iha direitu resposta ba publikasaun konsidera hanesan meiu efikaz ba reparasaun danu sira relativa ho ofensa ba direitu personalidade.

Iha sorin seluk, konduz ba difuzaun ba versaun alternativa, fakulta ba públiku hodi asesu ponto de vista ida diverjente ou kontraditóriu kona-ba asuntu mak hanesan ne’ebé kontribui ba diversifikasaun informasaun.  Nune’e direitu resposta la signifika hanesan forma asesu husi títular de direito hodi asesu ba orgaun komunikasaun sosiál no limita liberdade editoriál maibé ne’e hanesan direito atribuindo ba nia responsável sira hodi determina sira nia konteúdu. Ida-ne’e mós implika ba difusaun ba testu ne’ebé títular de direito ida elabora tenke iha paridade ho kondisaun ne’ebé motiva ba resposta ne’e haktuir ba principio igualdade de armas ou principio equivalência entre resposta ho testo respondidu.

Iha prinsípiu ida-ne’e signifika katak igualidade de armas tenke refleta iha kondisaun sira difuzaun resposta nian, designadamente iha nia estensaun, insersaun  no forma aprezentasaun. Nune’e bele iha releváncia atu atingi ho intensidade hanesan, sensivilemnte auditóriu hanesan ba asesu testu resposta nian.

Maske nune’e, direitu resposta ida-ne’e mós bele hetan rekuzasaun ho kondisaun sira hanesan tuir mai ne’e: (1) relativa ho intempestivu ne’bé haktuir iha númeru 1 no 4 Artigu 34.°, ilejitimidade husi reposdente ne’ebé haktuir iha númeru 3 Artigu 34.°. (2) rekuza ho hatudu fundamentasaun ba inexistência iha publikasaun ne’ebé la afeita ba reputação ou bom nome  títular ba direito nian ou referensia factu sira inverídicas ou errôneas kona-ba nia ne’ebé haktuir iha alínea a) numero 6 artigo 34 ° Lei N.° 5 /2014 de 19 de Novembro Lei da Comunicação Social. (3) tamba viola normas sira ne’ebe relasiona ho konteúdo ba resposta hanesan falta relasaun directa no útil ba resposta no ratifikasaun ho texto ou imagem ne’ebe extensaun excessiva, expressa desproporcionadamente desprimorosas. Previsaun ida ne’e konsta iha alínea b) no c) numero 6 artigo 34.° Lei N.° 5 /2014 de 19 de Novembro Lei da Comunicação Social.  Rekuza ida-ne’e tenke fundamentada husi responsavel editorial tuir previsaun iha numero 7 iha prazu ne’ebé determina ona.  

Bainhira kondisaun rekuzasaun hirak iha leten la konsege fundamenta no rekuza publikasaun ba direitu resposta mak orgaun ou meiu sei konsidera hanesan kontra ordenasaun ho punisaun koima $ 2.500 a $ 10.000 USD. Antes to’o prosesu kontra ordenasaun parte sira bele hatama prosesu arbitrajen no mediasaun ba Conselho de Imprensa hanesan haktuir iha alínea g) artigo 44.° Lei N.° 5 /2014 de 19 de Novembro Lei da Comunicação Social.  Ikus-liu bainhira parte sira la satisfeitu bele rekore ba prosesu judisiál hanesan haktuir iha artigo 36.° Lei N.° 5 /2014 de 19 de Novembro Lei da Comunicação Social.

Espirito husi previzaun norma hirak iha leten konsidera hanesan kontrolu públiku ba Liberdade imprensa no defeza públiku nian ba direitu personalidade kontra abuzu ba liberdade comunicação social.

Hakerek-na’in  Dr. Zenilton Zeneves

Linsensiadu Iha faculdade Direito UNTL

Referénsia:

Constituição Anotada da República Democrática de Timor-Leste, Bacelar de Vasconcelos, Pedro Carlos, Editor: Direitos Humanos-Centro de Investigação Interdisciplinar Escola de Direito da Universidade do Minho
Campus de Gualtar, Braga

Constituição da Republica Portuguesa anotada, Gomes Canotilho, J.J & Moreira, Vital, Coimbra Editora

Direito Comunicacao social, segundo edição revista aumentada

Alberto Arons de Carvalho

António Monteiro cardoso

Jaõo Pedro figueiredo

Casa das letras/editorial noticias

Legislação Anotada da Comunicação Social

de António Monteiro Cardoso, João Pedro Figueiredo e Alberto de Carvalho 

Editor:  Casa das Letras

Código Civil de Timor-Leste

Print Friendly, PDF & Email

LEAVE A REPLY

Please enter your comment!
Please enter your name here