Home Justisa Rekomendasaun CHEGA! Lei Defamasaun nian Labele Sai Nudar Lei Krime

Rekomendasaun CHEGA! Lei Defamasaun nian Labele Sai Nudar Lei Krime

482
0
Debate Pro no Kontra konaba Lei Kriminaliza Defamasaun. [Foto: Zevonia Vieira | 21.07.2020]

Reportazen Zevonia Vieira

“Politika nain sira la valoriza relatoriu CAVR, ema barak mate tanba luta ba ukun rasik an, no politika sira la respeita liberdade espresaun nian ne’ebe uluk sira hatoo iha durante funu”. Jose Luis Oliveira

TVE-T realiza debate konaba esbosu Lei Kriminalizasaun Defasamaun, hodi debate konaba preokupasaun publiku nian liu-liu komunidade jornalista, sosiadade sivil no estudante universitariu sira tanba bainhira Lei sekarik aprova, sei fo benefisiu deit ba ukun nain sira.

Liu hosi debate pro no kontra, hamosu hanoin ne’ebe diferensia tebes depende ba interpretasaun ba Lei sira ne’e.

Debator hosi Diretor Jeral Ministeriu Justisa, Nelino Vital hateten katak Ministeriu Jusitsa la kria Lei foun maibe aumenta ka adianta  deit Lei ne’ebe iha ona hosi kodigu sivil ba kodigu penal, hodi foka liu ba defamasaun no injuria ne’ebe mak bele estraga ema nia privasidade.

“Governu la kria Lei foun ida, maibe adianta deit artigu balun bai ha kodigu penal, hodi kriminaliza defamasaun no injuria katak labele tolok ka insulta ema nia privasidade tanba ema idak-idak iha nia dignidade”, hateten Nelino Vital iha programa debate pro no kontra iha studio TVE-T, 22/07.

Hanoin hanesan mai hosi juridiku Napoleon Bonaparte hateten katak teorikamente no legalmente kuandu Lei vigor nee katak defende ema hotu, laos defende grupu ida.

“La logika ida tanba ami mos parte hosi komunidade, ami mos ne’ebe halo Lei mos iha direitu ba Lei ida ne’e, bainhira hau la satisfas ho situasaun balun. Lei nee atu regula ema, hodi eduka sidadaun atu la defama ka insulta ema ida nia privasidade. Ami mos respeita Konstituisaun artigu 36 konaba honra no reputasaun no bom nome no ita iha direitu ba ema nia liberdade espresaun”, hateten Bonaparte.

Iha parte sorin Prezidente Konselho Imprensa, Virgilio Guterres ne’ebe kontra makaas ba esbosu Lei Kriminalizasaun Defamasaun hateten katak iha nasaun  demokratiku implika katak se deit mak ukun iha vontade popular, entaun kualker Lei ne’ebe mosu, labele limita fali vontade popular nian, liu-liu ema nia Liberdade espresaun.

“Lei Defamasaun ne’e iha ona iha Kodigu sivil no nudar baze hosi prosesu ukun an. Iha relatoriu CHEGA mos hateten katak labele kriminaliza Lei Defamasaun, tanba referensia nee foti hosi istoria pasadu, joven barak mak mate tanba luta ba ukun rasik-an, entaun la presiza atu kriminaliza Lei defamasaun”, hateten Virgilio Guterres, iha studio TVE-T, 21/07.

Virgilio kestiona tanbasa Lei ne’e mosu iha propagasaun Covid-19, durante ne’e budu iha ne’ebe, no derepente mosu, bainhira povu hotu presiza hetan asistensia sosial, liu-liu proteje sira iha pandemia Covid-19.

“Hare hosi parte direitus humanus nian, kadeia laos fatin atu eduka ema no la nesesariu iha nasaun demokratiku ida nee”, hateten Virgilio

Debator Jose Luis Oliveira ne’ebe iha hanoin hanesan ho Virgilio Guterres mos hateten katak atu debate konaba Lei Kriminaliza Defamasaun, tuir loloos Ministru Justisa mak mai, laos ekipa tekniku juridiku nian, tanba Lei ne’e liga ho kestaun politika tanba ema politika sira mak halo

Jose Luis hatutan saida mak Virgilio Guterres hateten katak iha relatoriu CAVR hatoo rekomendasaun barak, katak atu hamosu kultura no respeita direitus humanus, entaun iha ne’eba hateten katak atu la kriminaliza defamasaun. Politika nain sira la valoriza relatoriu CAVR, ema barak mate tanba luta ba ukun rasik an, no politika sira la respeita liberdade espresaun nian ne’ebe uluk sira hatoo iha durante funu.

“Direitu ba espresaun ne’e defende iha Konstituisaun RDTL, sei hamate direitu espresaun, imprensa no partisipasaun politika”, hateten Jose Luis iha studio TVE-T

Iha rekomendasaun CHEGA! no Per Memoriam Ad Spem iha artigu 3.5 konaba Direitu atu hetan partisipasaun fo garante ba Liberdade ne’ebe esensial, iha pontu 3.5.6 hateten Lei Defamasaun nian labele sai nudar Lei Krime ida, hodi husik tribunal ba kazu sivil mak sei tau regulamentu ne’ebe loloos, konaba asuntu ida ne’e.

Iha konstituisaun RDTL artigu 40, 41 no 42 ne’ebe foka liu konaba Liberdade koalia no informasaun nian Liberdade imprensa no komunikasaun sosian nian no Liberdade reunion no manifestasaun nian.

LEAVE A REPLY

Please enter your comment!
Please enter your name here