Reportajen David da Costa Gusmao
United Nations Funda for Population Activities (UNFPA) iha Timor-Leste kontinua serbisu hamutuk ho Ministeriu Saude (MS) no Inistitutu Nasional Saude (INS) hodi alkansa igualdade jeneru, promove empoderamentu feto no realiza direitu ba saúde sexual no reprodutiva ba feto no labarik feto sira ne’ebe krusial no krítiku hodi atinje dezenvolvimentu inkluzivu no sustentável
Koordenadór Prezidénsia, United Nations Fund for Population Activities (UNFPA ) Ronny Lindstrom, informa UNFPA serbisu hamutuk MS ho INS no parseiru implementador sira hanesan NGO local sira, atu fortifika kapasidade setór saúde nian, atu prevene no responde ba violénsia bazeia ba jéneru, no ativamente halo sensibilizasaun publika konaba impaktu saúde husi violénsia bazeia ba saúde no disponibilidade servisu sira ligadu ba atendimentu violénsia bazeia ba jeneru , inklui servisu saude,” dehan Koordenador prezidensia UNFPA, bainhira halo nia intervensaun iha Salaun Katedrál Vila Verde, Sesta 1/10.
Nia esplika atu alkansa igualdade jéneru, avansa empoderamentu ba feto sira, no realiza direitu ba saúde sexual no reprodutiva ba feto no labarik sira, krusiál no krítiku tebes atu atinje no alkansa dezenvolvimentu inkluzivu no sustentável.
Investe ba saúde sexual no reprodutiva sei salva moris ka vida ema nian, avansa ka promove igualdade jéneru, hadia saude no bem-estar, ajuda feto no labarik feto sira atu asesu ba edukasaun ida ho kualidade, no hetan serbisu ida ne’ebé di’ak no dignu, aumenta produtividade no rendimentu família, no hadia saude no bem-estar oan sira nian, ho nune’e kontribui makaas ba dezenvolvimentu amplu .
Nia haktuir UNFPA Timor-Leste komprometidu tebes atu aumenta no hasae disponibilidade, no uzu serbisu saúde sexual no reprodutiva ne’ebé integradu, inklui planeamentu familiar, saúde maternal no HIV/SIDA, ne’ebé responsivu ba jéneru no kumpre padraun direitu umanu nian, ba kuidadu kualidade no asesu ho ekuidadu.