Reportajen Santina Lucia da Costa
Prezidente Komité 12 Novembru, Gregóriu Saldanha husu governu tenke troka monumentu Jardín 12 Novembru Motaél, tau fali Monumentu Sebastião Gomes.
Hafoin komemorasaun Loron Nasionál Juventude ba dala-16 no Masakre Santa Cruz 12 Novembru ba dala-30, ba jornalista sira Prezidente Komité 12 Novembru ezije beibeik ona ba governu tenke troka monumentu jardín 12 Novembru Motaél ba monumentu Sebastião Gomes.
“Uluk AMP nia tempu iha tinan kotuk, iha governasaun kotuk mós governu promete atu troka, depois governu ida sai fali, ita hein eziji nafatin husu atu situasaun iha ne’eba ne’e bele troka, tau fali monumentu Sebastião Gomes ninian.” hateten, Gregorio Saldanha Mouris iha Rate Santa Cruz, 12/11.
Mouris dehan, labele nega fatin istóriku ida, lakohi ita foku de’it ba 12 Novembru ita haluha akontesimentu sira seluk mak hanesan Sebastião Gomes.
“Hau dehan tenke iha justisa, labele nega fatin istóriku ida, kuandu tau tiha ona 12 Novembru iha ne’eba signifika katak, atensaun boot liu tan, hau hanesan Prezidente Komite 12 Novembru, hau lakohi ita foku de’it ba 12 Novembru, ita haluha akontesimentu sira seluk mak hanesan Sebastião Gomes.” Nia konklui