Home EduTek TLDG Organiza Debate Entre Universitáriu ba Dala-3, Hodi Komemora Loron Nasional Juventude

TLDG Organiza Debate Entre Universitáriu ba Dala-3, Hodi Komemora Loron Nasional Juventude

223
0
Timor-Leste Debating Group.[Foto: Adroaldo | 13.11.2021]

Reportajen Adroaldo ‘Saretukau’

Timor-Leste Debating Group (TLDG) organiza Debate Nasionál ba dala-3 entre universidade sira iha Timor-Leste ho tema ‘The Voice of Future Generation Within the Realm of the Asian Parliamentary Debating System’ ne’ebé ensera iha loron 12 Novembru, hodi komemora mós loron juventude ba dala-16 no Masakre Santa Cruz ba dala-30.

Iha diskursu enserramentu ba Debate Nasional ba dala-3, Prezidente Komisaun oraganizadora Josefa Leonora Manzoia hateten Debate TLDG mak eventu annual ne’ebé boot, no halibur estudante universitáriu sira iha Timor-Leste ba debate, aleinde ne’e mos hodi komemora hamutuk loron Masakre Santa Cruz.

“Debate nasional TLDG nian mak terneiu anual debate ne’ebé boot no kompetitivu hosi TLDG, ne’ebé bai-bain organiza hahú hosi loron 7-12, Novembru. Grand Final realiza iha loron 12 Novembru hodi komemora loron nasional ba juventude, fo omenajen ba eroi hosi Masakre Santa Cruz”, hateten Josefa iha Salaun Ian Martin, Infordepe, sesta, 12/11.

Nia hatutan diversidade debate hosi TLDG, pozitivamente fo impaktu ba estudante universitáriu 200 liu ne’ebé hola parte iha kompetisaun debate desde tinan 2018. Joven hirak ne’e konfiável no matenek tanba debate ne’e dezafiadu no krítuku, kobre isu hotu, lokal, regional no nível global. Nia kongratula debator sira hotu ne’ebé dezafia sira nia aan hodi debate en termu de lian Ingles no debate ne’e rasik.

Nia konklui katak TLDG hanesan plataforma ida ne’ebé nakloke ba ema hotu la haree ba rasa, orientasaun seksuál no seluk, maibé fo oportunidade ba ema hotu, tanba igualdade mak signifikadu liu ba TLDG.

“Hanesan joven feto ida, ha’u enkoraja feto maluk sira atu ko’alia, ita la’os atu servisu de’it iha uma, ita bele aprende, bele lidera, bainhira de’it no iha ne’ebé de’it o hakarak. Ha’u enkoraja teb-tebes ba debator sira hotu, liu-liu ha’u nia feto maluk hodi aprende no dezenvolve”, heteten Prezidente Komisaun Josefa.

Iha fatin hanesan Cooperation Manager United Nation Development Program (UNDP), Sonia Mezahbeen kongratula TLDG tanba bele organiza eventu debate, ne’ebé bele tulun joven no estudante sira.

“Ha’u hodi UNDP nia naran kongratula ba TLDG ne’ebé kontinua organiza kompetisaun debate tinan tolu ikus ne’e. UNDP kontinua suporta empoderamentu juventude liu hodi nia programa no projetu sira”, hateten Cooperation Manager UNDP Sonia.

Nia hatutan ha’u haree ita boot sira hotu iha kreatividade, joven la’os grupu maibé joven mak estadu hosi hanoin, forsa hosi lia-fuan, wainhira ita boot sira envolve aan iha grupu sira hanesan ne’e, imi hotu kria forsa, hanesan ha’u haree imi ohin, ha’u bele haree debator joven tuur hamutuk, ha’u bele haree entuazmu, ida ne’e katak ba buat ida de’it, imi tenki investe, hatudu kualidade no iha forsa ba imi nia diversidade.

“Kompetisaun debate mak dalan ida ba imi nia talent, debate fo dalan ba imi atu hanoin krítiku, troka ideia no konkorda ka la konkorda”, hateten Cooperation Manager UNDP Sonia.

Iha parte sorin Deputy Ambassador Embaixada Autrália iha Timor-Leste, Suzi Wilson hateten, haksolok tebes atu suporta TLDG nia Debate Nasional ba dala-3 ne’e no nia fo parabens mos ba komemorasaun loron nasional juventude.

“Debate ne’e la fasil, liu-liu mak debate ho lian ne’ebé la’os imi nia lian inan, no Inglés ne’e lian ne’ebé tricky ba esepsaun no kontradisaun, maibé abilidade ne’ebé imi aprende, hanoin krítiku, oinsá atu halo argumentu ida di’ak, oinsá atu reflete, ida ne’e importante tebes” hateten Sonia.

Iha parte sorin, fundadór TLDG, Jo Monteiro hatete liu hosi debate ne’ebé mak da-dauk ne’e TLDG organiza, sei haree diferensa ho debate sira mak akontese iha sosial media hanesan Facebook no ida ne’a ajuda ita oinsá mak hatene atu debate ne’ebé loloos.

TLDG nia Debate Nasional ba dala-3 ne’e organiza tanba hetan suporta hosi UNDP, Knua Juventude Fila Liman, Embaixada Austrália iha Timor-Leste, Bee Lafaek, Telkomcel, Timor Telecom, Eskola Superior Medicina UNTL, Servisu Autónomo Medicamentos de Saúde (SAMES) no Ministériu Edukasaun, Infordepe.

Debator sira ne’ebé mak partisipa iha debate ne’e mai hosi estudante universitáriu sira ita Timor-Leste ne’eb’e mak sei partisipa debate ho mosaun oi-oin hahú hosi nasional, rejional to’o global. Vensedor dahuluk ba debate ne’e hosi Estudante John Saldanha University, segundu lugar hosi Universidade Nasional Timor Lorosa’e (UNTL) no manan na’in da-toluk nafatin hosi Universidade Nasional Timor Lorosa’e (UNTL).

Print Friendly, PDF & Email

LEAVE A REPLY

Please enter your comment!
Please enter your name here