Home Feature Grupu Kooperativa Karidade Produs Tais, Produtu Folin Bainhira Iha Feira

Grupu Kooperativa Karidade Produs Tais, Produtu Folin Bainhira Iha Feira

327
0
Grupu kooperativa Karidade iha Balibo. [Foto: Santina Lucia da Costa | 26.10.2020]

Reportazen Santina Lucia da Costa

Hosi kreatividade parte ida bele hamosu ideas hodi kria ekonomia rasik hodi hatutn moris. Tais ho koris oin-oin ho tara iha tenda okos iha Balibo vila, hodi komemora loron trajedia Balibo Five iha loron 16 Outubro. Tais nia furak ho halo loro Balibo Five ba dala 45 sai furak liutan.

Maria martins Xavier, nain hosi grupu Kooperativa ho naran Karidade nudar naran kode klandestina nian. Jornalista Neon Metin dada lia ho Maria iha tenda okos bainhira nia faan nia tais iha komemorasaun Balibo Five.

Maria produs Taus original hosi Municipiu Bobonaru ne’ebe lokaliza iha aldeia Atara, suku Balibo Vila. Nia hateten fofoun harii ho naran Karidade. Iha grupu Karidade iha feto nain haat no mane nain tolu ne’ebe involve jovem nain rua, hodi bele selu sira nia eskola.

 “Hau harii grupu ne’e tanba, hau nia atividade lor-loron mak soru tais, depois hau hanoin soru ne’e labele soru de’it, maibe tenke dada ho feto maluk sira hodi imvolve mos,  se karik ita la inklui feto maluk sira iha laran entaun soru laiha, tanba ne’e harii grupu ne’e”, hateten Maria.

Nia dehan iha futuru jerasaun sira kontinua nafatin saida mak tenke halo, “tenke kria rasik  kampu serbisu ba ita nia-an, hodi hadia ekonomia familia no mos selu oan sira nia eskola”.

Grupu Karidade ne’ebe produz tais, morten, estatua halo husi Ai, pasta tais no seluk tan, iha dadalia Maria konfesa katak durante harii grupu kooperativa hasoru difikuldade barak, liu-liu kona-ba atu sosa material,  iha grupu dalaruma ema nia hanoin la hanesan, balun hakarak tama mai simu osan direita osan, se osan laiha sira ba ona, depois ita bolu sira mai atu fo treinu kona-ba soru, haree kabas ba fase, ba buat sira ne’e maibe sira pasiensia laiha, liu-liu ba joven sira no susar atu adapta.

Situasaun COVID-19 hamosu preokupasaun boot ba grupu Karidade, fulan 8 ona produtu ne’e butuk tanba ema la hola, babain ema estranjeiru mak sempre hola, maibe barak fila ona ba sira nia rain, ida ne’e sai obstaklu ba sira, oinsa kontinua haburas grupu kooperativa ida ne’e.

 “Ami dalaruma maun Rui hosi grupu fashion show iha Dili, dalaruma sira hameno no grupu ida naran Jeitu iha Dili ne’e mos hameno ami soru haruka ba, foin dadauk sira mai ami hato’o ami nia problema, no sira sosa tais lori fali ba Dili. Ami mos bele faan iha merkadu, iha uma mos bele faan, depois ami mos ba fa’an iha CLC, museum maibe durante fulan 8 nia laran ne’e, nein ema ida sosa, agora ami paradu, ami tenki selu banku nia osan tanba ami kredit”, tenik Maria.

Maria haktuir katak antes virus Corona mosu, Karidade faan sira nia produtu fulan ida bele hetan osan to’o $100, iha CLC hanesan Muzeu labele foti lor-loron ka semana no bainhira ema hola barak fulan ida bele hetan to’o $100

Nia haktuir ba trabalhador sira atu hetan osan, konforme sira nia produtu ne’ebe mak iha hatama, tais ida konforme sukat nia metro no kualidade tais no konforme material ne’ebe mak sira foti husi grupu ka sira nian rasik, karik material mak sira nian tais ida, loron ida ami fo $6.00 Dollar.

Ba Neon Metin Maria hateten Fundasaun Alola konsege fo formasaun konaba oinsa halo kor natural ba kabas, maibe iha Balibo susar atu hetan kor natural.

Xefe grupu Karidade ne’e husu ba governu, atu tau matan ba oinsa buka solusaun ba grupu kooperativa sira, atu sira bele asesu merkadu. Nia konfesa katak hatama ona proposta barak maibe la hetan repsonde diak tanba problema ho orsamentu.

“Sebele ajuda grupu feto rural sira, hodi halo feira nun’e ami bele ba faan ami nia produtu, nune’e produtu ne’e bele iha folin”, hateten Maria ho esperansa boot.

Entretantu Administrador Postu Balibo, Rosario Gonçalves hateten Sekretariu Estadu Igualdade no Inkluzaun (SEII) halo ona esforsu hodi promove produtu lokal sira ne’ebe kria hosi grupu feto rural sira,

 “Agora serimonia sira hanesan ne’e mak sira fa’an, administrador nia parte mak wainhira hetan ona infromasaun katak, serimonia balun iha presiza atu loke feria iha ne’eba no presija grupu balun atu aprezenta, administrador sempre fo hatene sira”, hateten Rosario Gonçalves.

LEAVE A REPLY

Please enter your comment!
Please enter your name here