Reportajen David da Costa Gusmao
Forum Organizasaun Naun-governamentál Timor-Leste (FONGTIL) ofisiálmente ohin loron 21 Outbru hato’o keixa membru governu na’in 7 ho delegasaun na’in 120 ne’ebé partesia iha Expo Dubai ba Komisaun Anti Korrupsaun (KAK).
“Ofisiálmente ami mai lori informasaun sira i hato’o keixa formalmente bazeia ba kodigu penal Timor- Leste, ba KAK hanesan Polisia espesiál ba kombate krime korrupsaun, keixa ne’ebé ami halo relasiona ho membru governu nain 7 no mós ho delegasaun 120 pesoál ne’ebé partisipa iha expo DUBAI 2021“Dehan Diretór Ezekutivu FONGTIL, Daniel do Carmo Santos iha edifísiu KAK Faról, Kinta21/10.
Nia dehan razaun fundamental ne’ebé FONGTIL hato’o keixa ba KAK, relasiona ho informasaun no dadus ne’ebé sira hetan katak delegasaun ne’ebé partisipa iha Expo Dubai ne’e fo prejuizu ba estadu Timor-Leste.
“Razaun ami mai halo keisa ba KAK tanba tuir Informasaun dadus sira ne’ebé ami hetan katak delegasaun ne’ebé partisipa iha expo Dubai fó prejuizu ba estadu Timor, signifika estadu lakon, entaun kodigu penal Timor-Leste artigu 13/200/14 fo dalan ba ema indivíduu koletiva ou sidadaun sé de’it bele hato’o keisa ba KAK bainhira deskonfia katak partisaun Timor-Leste iha expo Dubai fó prejuizu ba ita nia estadu ka halo ita nia estadu lakon”, nia esplika.
Iha fatin hanesan Komisáriu Komisaun Anti Korrupsaun, Sergio Hornai hatete hanesan órgaun polisia kriminál, tuir prosesu kodigu penál ne’ebé mak eziste iha iha Timor ida ne’e, katak instituisaun hanesan Ministériu Públiku, orgaun polisia kriminál hotu ne’ebé eziste iha rai ida ne’e. Bainhira iha keixa ka denunsia sira ne’ebe mak hatama mai iha instituisaun. Instituisaun nia obrigasaun atu bele simu no rejista. halo kontinuidade ba prosesu ne’e rasik, atu to’o iha ne’ebé presiza halo analiza klean, depois halo nia sekuénsia sira tuir marsa prosesuál sira ne’ebé mak ita nia lei haruka.
“Atu kaptura membru na’in 7 ne’ebé fila husi expo dubai ne’e, hanoin ida ne’e husi ita nia pareseiru organizasaun naun-governamentál FONGTIL nian,” nia esplika.
Nia dehan razaun sira ne’e hotu validu kuandu ita tun ba iha ida-idak nia natureza. Bainhira natureza sira ne’e rehuni no priense rekesitu sira ne’ebé lei hateten, autoridade sira ne’ebe kompetente sei ezerse nia funsaun, para halo medida hirak ne’e.
“Buat sira ne’e hotu depende ba sirkunstánsia, depende ba termites sira ne’ebé daudaun ita halo medidas polisia, atu halo ezerse ninia funsaun hodi halo medida sira hanesan ne’e,” dehan nia.
Entretantu iha parte seluk Xefe Delegasaun Expo Dubai no nu’udar Ministru Koordenadór Asuntu Ekonómiku (MKAE), Joaquim Amaral ba jornalista sira iha aero portu, bainhira fila husi expo Dubai, iha loron 21 Outubru hateten katak ba asuntu estadu, bainhira KAK bolu atu ba hatán kestaun balun, prontu atu koopera.
Liuhusi publikasaun ne’ebe Hatutan.com fo sai relata katak iha artigu 34 konaba Regra Espesiál Relativa ho viajen ofisial ba estranjeiru iha númeru 4 hateten, delegasaun ofisial sira labele liu ema nain lima ho esepsaun delegasaun sira ne’ebe akompaña Primeiru Ministru ka delegasaun sira ne’ebe ba ho Ministeriu rua no membru governu nain rua.
Realidade delegasaun ne’ebe ba partisipa iha expo Dubai hamutuk 120. Expo Dubai 2021 nu’udar expo mundial ne’ebe boot liu depois de copa mundial. Expo ne’e rasik sei hala’o durante fulan 6 nia laran, hahu husi 20 Outubro 2021 to’o 10 Abril 2022.
