Reportajen Santina Lucia da Costa
Relasiona ho rekrutamentu Falintil-Forsa Defeza Timor-Leste (F-FDTL) joven na’in 600, husi númeru ne’e iha loron 20/10/2021, membru F-FDTL foun ida halai sai husi markas iha Metinaro tanba la aguenta instrusaun F-FDTL.
Membru F-FDTL foun ne’ebé mak halai sai husi kampaun F-FDTL Metinaro ho naran Adelio Fernandes do Rego, husi Munisípiu Manufahi halai sai la’os foin premeira vez maibé antes ne’e nia koko atu halai sai, maibé la konsege no ohin mak nia konsege halai sai.
Hafoin enkontru ho Prezidente Repúblika, Vise-Xefe Estadu Maiór Jenerál Forsas Armadas, Majór Jenerál, Domingos Raul “Falur Rate Laek,” informa foin daudaun membru F-FDTL foun ida halai sai tan, tanba la aguenta ho instrusaun.
“Ida ohin halai sai tan tanba la aguenta instrusaun, agora membru F-FDTL ne’e subar iha ne’ebé, karik sei buka hela, karik imi deteta ajuda fo informasaun para ami ba kaer tuir prosesu para transparente liu tan.”hateten Vise-Xefi Estadu Maiór Jenerál, Forsas Armadas, Majór Jenerál, Domingos Raul “Falur Rate Laek,” iha Palasiu Prezidensial, Nicolau-Lobato, Bairu-Pite, 20/10.
Falur Rate Laek dehan ho situasaun Militár tenke kolen no balun fraku, no balun aguenta ho treinu, joven hanoin katak tama militár ne’e fasil, ne’e difisil.
“Situasaun uitoan sira kolen, fraku, balun aleijadu, balun la aguenta, joven hanoin katak tama militar ne’e fasil, ne’e difisil, susar, ami sira hamriik ho pankat hanesan ne’e konkista, liu prosesu mak to’o iha ne’e, tau de’it farda no taka sapeo ne’e sakrifisiu boot, sira la aguenta mais ami treinu sira.” Haktuir Falur Rate Laek.
Nia akresenta depois kaer tiha ida foin halai sai, ne’e mak se posibilidade substitui fali rezerva ne’e bele, mais matéria balun liu ona maka nia (rezerva), mai repete fali labele ona tanba iha matéria ensinu sistematizadu, to’o nivel ne’ebé nia lakon ne’e labele tama ona.
“Sira ida foun foin tama ne’e sira foin aprende, hatais sapatu, farda, forma oinsá, lao oinsá, mais ida ne’e liu ona pois ba fali faze seluk ne’e (rezerva), labele tama ona.” Tenik, Falur.
Entretantu antes ne’e iha membru foun na’in ida husi Munisípiu Lautem rezigna-an, tanba la toman situasaun Militár no konsege substitui fila-fali ho espesialidade sira hodi kontinua prienxe númeru membru F-FDTL foun.
